Lakers sugod na's ilang title defense

CEBU, Philippines — Sugdan na sa Los Angeles Lakers ang kampanya pagpanalipod sa ilang korona dihang ang 2020-2021 NBA season mosikad karong adlawa uban ang duha ka mga duwa sa managlahing binyu.

Ang Lakers mangandam alang sa laing lisud nga tahas, duha ka bulan human nila nadaog ang NBA bubble title didto sa Orlando, Florida.

Gitapos sa Lakers ang Miami Heat sa unom ka duwa aron sakmiton ang ika-17 nga kampiyonato sa ilang prangkisa.

Uban sa star duo LeBron James ug Anthony Davis nga mangu sa ilang kampanya, ang Lakers mas lig-on karon tungod sa pagbira nila sa idlas nga point guard nga si Dennis Schroder gikan sa Oklahoma City Thunder, Montrezl Harrell gikan sa LA Clippers ug sa beteranong sentro nga si Marc Gasol.

Masukod karon ang ka-epektibo sa bag-ong line-up sa Lakers dihang ilang sangkaon ang ilang silingan nga LA Clippers sa alas-10 sa buntag (oras dinhi sa Pilipinas) didto sa Staples Center sa Los Angeles, California.

Si James ug kaubanan moharong sa Clippers nga bidahan nilang Kawhi Leonard ug Paul George uban sa bag-o nilang rekrut nga si Serge Ibaka.

Sa laing bahin, si Kevin Durant gitakdang mopakita sa iyang unang duwa uban sa Brooklyn Nets dihang manulong sila sa Golden State Warriors nga gipangulohan ni Stephen Curry.

Si Durant, ang 2014 Most Valuable Player ug two-time Finals MVP, mobalik sa aksiyon human  mawala sa eksena sa NBA sud sa 16 ka bulan moharong batok sa kanhi niya koponan diin milangkat kini og "back-to-back" championships niadtong 2017 ug 2018.

Masentro sa duwa nga sugdan sa alas-7 sa buntag mao ang 32-anyos nga si Durant kon unsahon niya pagsabot ang iyang kaubang superstar nga si Kyrie Irving.