Canelo daog batok Smith: Milangkat duha ka super middleweight titles
CEBU, Philippines — Gipamatud-an ni Canelo Alvarez nga angay siyang ilhon isip "pound-for-pound" king human gipilde si Callum Smith aron langkaton ang duha ka titulo sa main event sa DAZN boxing card kagahapon didto sa Alamodome sa San Antonio.
Nadaog ni Canelo ang WBA super middleweight ug WBC super middleweight titles human sa 12 ka hugna nilang binukbukay.
Duha ka hurado mihatag og 119-109 ug ang usa miiskor og 117-111 pabor ngadto sa Mexican superstar alang sa unanimous decision nga daog.
"I did a great job after 13 months of layoff. I'm so happy," asoy pa ni Canelo. "I'm the best in the world. Through the third round, I tried to see what he brings in terms of skills but I showed what I am."
Gumikan niini, giinat ni Canelo ang iyang rekord ngadto sa 54-1-2, 36 KOs, samtang si Smith nga nakatilaw sa labing unang pilde nagbitbit og 27-1, 19 KOs.
Si Alvarez, 30-anyos mas dominante sa maong sangka ug iyang gidabodabohan si Smith pinaagi sa iyang wala ug tulo nga mga suntok.
Nakaigo siya og 97 sa gilabay niyang 209 ka suntok. Aduna siya'y 57 percent sa iyang power shots.
Dihang gipangutana kon moharong ba kini sa iyang karibal nga si Gennady Golovkin, kinsa bag-o lang nakadepensa sa iyang IBF title sa 160- pounds, si Canelo igo lang mipahiyom.
- Latest
