Duwa sa Kings ug Fuel Masters

Para finals

CEBU, Philippines — Luna sa finals ang tuyo sa Barangay Ginebra Kings ug Phoenix Super LPG Fuel Masters sa dihang ilang harungon og usab ang tagsa-tagsa nila ka mga karibal sa Game-4 sa "best-of-five" PBA Philippine Cup semifinals karong adlawa didto sa AUF Sports Arena sa Angeles City, Pampanga.

Mag-abot ang Kings ug ang Meralco Bolts sa alas-3:45 sa hapon ug pagasundan kini sa kumbati tali sa Fuel Masters ug TNT Tropang Giga sa alas-6 sa gabii.

Parehong nagbitbit og 2-1 bentaha, ang Kings ug ang Fuel Masters nanginahanglan na lang og usa ka daog aron moabante sa kampiyonato sa makasaysayanong torneyo sa liga nga giduwa sud sa Clark bubble tungod sa pandemiya.

Angayan hinuon nga mangandam ang Ginebra ug Phoenix alang sa usa ka dakong gubat gumikan kay seguradong makigpatay ang ilang kontra aron makabawos ug inaton ang serye.

Mismo si Ginebra coach Tim Cone ang miangkon nga lisud nga tahas ang pagpaglagpot sa Bolts.

Sa iyang bahin, si Meralco coach Norman Black nagkanayon nga maningkamot sila og maayo nga makabawos gumikan kay wala na may ugma nga nagpaabot kanila kon ugaling mapilde sila karon.

Sama sa Bolts, ang Tropang Giga determinado sab nga makapanimalos sa Fuel Masters nga mibuntog kanila sud sa duha ka sunod-sunod nga higayon.

"Alam na alam na nila mga usual na ginagawa namin. Nasasangga na nila," angkon pa ni TNT coach Bong Ravena. "Kailangan naming ibahin suntok, kasi kami nasusuntok nila, salag lang kami ng salag."

Ang Game-5 kon gikinahanglan, duwaon karong Biyernes.