Rain or Shine miangkon katapusang luna sa quarterfinals
CEBU, Philippines — Gibihag sa Rain or Shine Elasto Painters ang TNT Tropang Giga, 80-74 aron sakmiton ang ikawalo ug katapusang luna sa quarterfinals sa PBA Philippiner Cup bubble play didto sa AUF Sports Center sa Angeles City, Pampanga.
Doble ang igo sa E-Painters (6-4) gumikan kay ang ilang kadaogan hingpit man sab nga nagsira sa pultahan sa NLEX Road Warriors nga makaabante sa sunod nga hugna sa torneyo.
Sa pagtaak sa Rain or Shine sa playoffs, si James Yap maoy nagdagkot sa kayo sa ilang opensiba human mikadlit sa tanan niyang 16 puntos sa first half.
Mikisaw sab sila si Jvee Mocon, Beau Belga, Gabe Norwood ug Mike Borboran alang sa E-Paintes nga nakigduyog sa Barangay Ginebra, TNT, Phoenix Super LPG, San Miguel, Alaska, Meralco ug Magnolia sa quarterfinals. Mobakwit na sa PBA bubble ang nangatagak nga NLEX, Blackwater, NorthPort ug Terrafirma.
Si Mocon mihipos og 16 puntos ug 10 ka rebounds, si Belga miiskor og 12, samtang sila si Norwood ug Borboran nagkumboya'g 19 puntos alang sa E-Painters.
Nakatabla pa unta ang Tropang Giga, 72-72, apan ang E-Painters milusad og panapos nga 8-2 run aron makuha ang krusyal nilang daog.
Si Troy Rosario dunay 18 puntos, samtang sila si Poy Erram ug Ray-Ray Parks nagkumbinar og 25 puntos alang sa Tropang Giga nga sud na sab sa quarterfinals uban ang 7-4 nga baraha, apan nameligro pang matagak sa top 4 nga dunay twice-to-beat advantage sa playoffs.
- Latest
