Pacquiao-Crawford fight nasa radar pa rin ni Arum

MANILA, Philippines — Nasa radar pa rin ni Top Rank Promotions chief Bob Arum ang planong unification fight nina World Bo­xing Organization (WBO) welterweight king Terence Crawford at World Boxing Association (WBA) welterweight champion Manny Pacquiao.

Hindi pa rin sumusuko sa posibilidad na magharap sina Crawford at Pacquiao sa susunod na taon sa kabila ng ikinakasang laban ng Pinoy champion kay Ultimate Fighting Championship superstar Conor McGregor sa 2021.

Nakatakda munang depensahan ni Crawford ang kanyang titulo laban kay Kel Brook ng Great Britain sa Nobyembre 14 sa MGM Grand Conference Center sa Las Vegas, Nevada.

Matapos ang laban, inaasahang gagalaw na si Arum para maikasa ang susunod na laban ni Crawford kung saan ang No. 1 target ay si Pacquiao.

Desidido si Arum na makuha ang Pacquiao-Crawford fight dahil alam nito ang popularidad ng Pinoy pug na tunay na humahatak ng fans sa iba’t ibang panig ng mundo mula sa gate receipts hanggang sa pay-per-view.

Kaya naman gagawin ng Top Rank chief ang lahat para makuha ang laban.

Maliban kay Pacquiao, isa pang option ni Arum ang unification bout laban kay Errol Spence Jr. na dedepensahan naman ang kanyang World Boxing Council (WBC) at International Boxing Federation (IBF) welterweight belts kontra kay Danny Garcia sa Disyembre 5.

“The next fight (for Crawford) is going to be, as far as I can control things, we’re not going to fool around, it’s going to be Pacquiao or Spence,” ani Arum sa panayam ng Bad Left Hook.

Ngunit mananatiling nakatunganga si Arum dahil nasa kamay ni Pacquiao ang huling desisyon.

Nauna nang inihayag ni Pacquiao na kabilang si Crawford sa mga pinagpipilian nito.