Orcollo kampeon sa Texas Open 9-Ball
MANILA, Philippines — Matapos ang kanyang runner-up finish sa One Pocket event, rumesbak si dating world champion Dennis Orcollo nang angkinin nito ang kampeonato sa 9-Ball event sa 47th Annual Texas Open sa Skinny Bob’s Billiards sa Round Rock, Texas.
Hindi inisip ni Orcollo ang pagod matapos ang pukpukang laban nito sa One Pocket.
Dala ang determinasyon, matikas na pinataob ni Orcollo si American cue master Billy Thorpe sa pamamagitan ng 9-4 demolisyon para masikwat ang korona.
Nagtala si Orcollo ng sunud-sunod na panalo kabilang ang pananaig kina Ruben Bautista, Roberto Gomez, Tony Chohan, Sergo Rivas para makapasok sa semifinals ng winners’ bracket.
Naibulsa ni Orcollo ang unang tiket sa finals nang pataubin sa semis si Thorpe sa iskor na 9-3 desisyon para mahulog ang Amerikano sa losers’ bracket.
Rumesbak si Thorpe sa one-loss side nang pabagsakin nito ang Pinoy na si Jeffrey De Luna (9-8) sa semis ng losers’ column para muling makaharap si Orcollo sa finals.
Tila naubos na ang lakas ni Thorpe sa gitgitang laban nito kay De Luna sa semis dahilan upang maging malamya ang laro nito sa finals at tuluyang ipaubaya kay Orcollo ang panalo.
Ibinulsa ni Orcollo ang $8,000 premyo habang nagkasya lamang sa $5,500 konsolasyon si Thorpe.
Hindi naman uuwing luhaan si De Luna na nagkamit ng $3,500 sa kanyang third-place finish.
Ito ang ikasiyam na titulo ni Orcollo sa taong ito upang mapatatag ang kanyang kapit sa No. 1 spot sa Az Billiards ranking.
Nagkasya lamang sa runner-up finish si Orcollo sa One Pocket event na pinagwagian ni Gomez.
- Latest
