Petecio nagpapasaklolo sa PSC
Para sa renta ng apartment, boxing gym
MANILA, Philippines — Inaasahang hindi mapapahiya si national boxer Nesthy Petecio kay Philippine Sports Commission (PSC) chairman William ‘Butch’ Ramirez.
Nagrenta ng isang apartment at boxing gym si Petecio sa Digos City, Davao del Sur bilang paghahanda sa paglahok sa Olympic Games qualifying tournament sa susunod na taon.
Ginamit ng gold medalist sa 2019 AIBA Women’s World Boxing Championships ang kanyang allowance para sa pagbabayad sa apartment at membership sa boxing gym.
“Iyong apartment ko po 4k po monthly, hindi kasama iyong tubig at kuryente. Sa gym naman po nag-apply ako ng one year na membership tapos for one month na bayad. Bale P2,200 po nabayaran ko,” ani Petecio.
Kamakalawa ay sinabi ni PSC Commissioner Charles Maxey na ilalahad niya sa PSC Board ang nasabing request ng 28-anyos na tubong Santa Cruz, Davao del Sur.
“Sabi naman po ni (PSC) Comm. Charles Maxey sasagutin daw ng PSC at pag-uusapan po nila sa Board,” wika ni Petecio, nagbulsa ng gintong medalya noong 2019 Southeast Asian Games.
Nabigo si Petecio na makapitas ng Olympic slot nang matalo sa kanyang featherweight match kay Japanese Sena Irie sa Asia and Oceania Boxing Olympic Qualification Tournament sa Amman, Jordan.
Isa si Petecio sa mga Pinoy athletes na tumatarget ng Olympic ticket bukod pa kina 2016 Olympic Games silver medalist Hidilyn Diaz (weightlifting), 2018 Asian Games gold medal winner Margielyn Didal (skateboarding), Fil-Japanese Kiyomi Watanabe (judo) at Fil-Ams Kristina Knott at Eric Shaun Cray (athletics).
- Latest