Garcia handang lumipad sa Pilipinas
Para labanan si Pacquiao
MANILA, Philippines — Desidido si Mikey Garcia na gawin ang lahat para matuloy ang laban kontra kay eight-division world champion Manny Pacquiao.
Handa si Garcia na lumaban saan mang sulok ng mundo matuloy lamang ang laban.
Ready din itong tumulak sa Pilipinas sakaling mapagdesisyunang idaos sa Maynila ang laban.
“I’ll fight him (Pacquiao) anywhere. It don’t matter where the fights at. The rings don’t change does it? Is there like six corners all of a sudden or two corners? Four corners, four ropes, same thing,” ani Garcia.
Kating-kati na si Garcia na sagupain si Pacquiao dahil alam niyang malaki ang maitutulong nito sa kanyang boxing career.
Alam ng lahat na parating blockbuster ang laban ni Pacquiao na tunay na dinudumog ng mga boxing fans saan man ito ganapin.
Bukod pa rito ang karangalang makasagupa ang isang living legend gaya ni Pacquiao.
Subalit ang pangarap na ito ni Garcia ay mananatiling pangarap na lamang muna dahil wala pang plano si Pacquiao na sumabak hangga’t may coronavirus disease (COVID-19).
Ayon kay American trainer Freddie Roach, walang plano ang kampo ng Pinoy champion na lumaban pa sa taong ito.
Kaya’t posibleng sa susunod na taon na maikasa ang susunod na laban ni Pacquiao.
Marami ang kandidato para sa susunod na laban ni Pacquiao.
At si Garcia ang isa sa mga ito.
Kabilang din sina Danny Garcia, Terence Crawford, Shawn Porter at Errol Spence gayundin sina Mixed Martial Arts superstar Conor McGregor at undefeated American fighter Floyd Mayweather Jr.
Sa ngayon, abala si Pacquiao sa kanyang tungkulin bilang Senador at sa mga aktibidad para tulungang masugpo ang COVID-19.
- Latest
