Coach nurse nagpahigot sa Raptors

CEBU, Philippines — Mipirma og lab-as nga kontrata si coach Nick Nurse nga molanat og pipila ka tuig uban sa Toronto Raptors.

Gipasidunggan nga 2019-2020 NBA "Coach of the Year" ning bag-o lang, si Nurse migiya sa Raptors sa labing una niining kampiyonato sa NBA sa miaging tuig.

Ang Raptors gitagak sa Boston Celtics sa Eastern Conference semifinals sa miaging semana nga maoy nagtak-op sa ilang season diin sila mikulit sa ikaduhang labing nindot nga rekord sa liga, 53-19.

Bisan og wala makalahutay sa East Finals, taas gihapon ang pagsalig sa Raptors sa katakus ni Nurse aron mogiya sa team sa umaabot pang mga katuigan.

"Our confidence in Nick just continues to grow, and part of that comes from what we've experienced together," matud pa sa presidente sa Raptors nga si Masai Ujiri. Sa duha ka seasons niya sa Raptors, si Nurse mikulit og 111 ka daog batok sa 43 lamang ka pilde sa regular season. Sa playoffs, miposte siya og 23 ka daog ug 12 ka pilde.