Raptors mipuwersa game 7

CEBU, Philippines — Nagpabiling buhi ang kampanya sa Toronto Raptors nga madepensaan ang ilang titulo human  nilang gibuntog ang Boston Celtics, 125-122 sud sa duha ka overtime aron pagpuwersa og Game 7 sa ilang NBA Eastern Conference semifinal series kagahapon didto sa Orlando, Florida.

Si Kyle Lowry mikadlit og 33 puntos ug si Norman Powell midugang og 23 puntos alang sa Raptors nga mitabla sa serye, 3-3, aron harungon og usab ang Celtics sa tigakay nga duwa ugmang adlawa diin ang modaog maoy makigsangka batok sa nagpaabot nga Miami Heat sa Eastern Conference Finals.

Sa miaging season, ang Raptors milangkat sa labing una nilang korona sa NBA, apan si Finals MVP Kawhi Leonard mibiya kanila sa off-season aron motapon sa Los Angeles Clippers nga mipakgang sa Denver Nuggets, 96-85  aron pagposte og 3-1 nga bentaha sa Western Conference semifinals series.

Si Leonard kuwangan og usa na lang ka assist aron morehistro og triple-double uban ang 30 puntos,11 ka rebounds ug siyam ka assists alang sa Clippers nga mahimo nang moabante sa West Finals kon modaog sila pag-usab Nuggets sa Game 5 ugmang adlawa. Sikit kaayo ang kumbati tali sa Toronto ug Boston, apan katapusan nakasikit ang Celtics sa iskor nga 122-123 human sa 3-pointer ni Jayson Tatum sa nahibiling 6.2 segundos sa ikaduhang overtime gumikan kay si Powell milansang og duha ka free throws aron pagtuldok sa daog sa Raptors.

Duna pa unta'y tsansa ang Celtics nga iduso ang duwa ngadto sa ikatulong overtime, apan nasipyat ang giitsa nga tres ni Marcus Smart dayong kapupos sa oras.

Si Jaylen Brown maoy nangu sa Celtics uban ang 31 puntos ug 16 ka rebounds. Si Tatum migaling og 29 puntos, 14 ka rebounds ug siyam ka assists, samtang si Smart naka-triple double bitbit ang 23 pountos, 11 ka rebounds ug 10 ka assists, apan nakawang ang iyang paningkamot sa habig sa Boston.

Sa laing aksiyon, ang Clippers mipaduol ngadto sa usa na lang ka duwa aron motikang sa conference finals sa labing unang higayon sukad sila miapil sa liga niadtong 1970 diin sila gitawag pa nga Buffalo Braves. Nagpabilin sila nga Buffalo Braves sud sa walo ka seasons ug laing unom isip San Diego Clippers sa wala pa mobalhin sa Los Angeles niadtong 1984.Ang Clippers wala na molingi pa sukad sila mobulhot sa sayong 26-12 nga labaw. Kon ugaling pakgangon og usab ang Nuggets ugmang adlawa, hayan nga putlon nila ang 50 ka tuig nilang paabot nga makataak sa conference finals sa labing unang higayon sa kasaysayan sa ilang prangkisa.