Clippers mitagak sa Mavericks

Celtics nakauna sa Raptors sa Eastern semifinals series

CEBU, Philippines — Mipakita na sab sa iyang kabangis si Kawhi Leonard diin mikadlit og 33 puntos,14 ka rebounds, pito ka assists ug lima ka steals sa dihang  ang Los Angeles Clippers  mitagak sa karibal nilang Dallas Mavericks human miposte og 111-97 nga daog sa Game-6 sa ilang best-of-seven NBA first-round playoff series kagahapon didto sa Orlando, Florida.

Gihuman sa Clippers ang serye, 4-2, aron pag-abante niini sa Western Conference semifinals diin ilang harungon ang modaog sa serye tali sa Utah ug Denver nga nagtabla karon sa series, 3-3 human gibuntog sa Nuggets ang Jazz, 119-107 sa Game-6 kagahapon.

Mibida sa kadaogan sa Nuggets mao si Jamal Murray nga mipabuhagay og 50 puntos.

Sikit pa unta sa sinugdanan ang kumbati, apan ang Clippers miabli sa second half pinaagi sa paglusad og 20-3 run aron pagpaburot sa ilang labaw ngadto na sa 23 puntos sa iskor nga 77-54 nga maoy nakapabarag sa Mavs sa nahibiling bahin sa duwa.

Si Luka Doncic mipabuto og 38 puntos, apan wala magsilbe sa nanamilit nang Mavs.

Sa Game-1 sa best-of-seven Eastern Conference semis, sila si Jayson Tatum ug Marcus Smart mipupo og 21 puntos matag usa sa dihang gilabhan sa Boston Celtics ang defending champion Toronto Raptors sa iskor nga 112-94. Si Kemba Walker midugang og 18 puntos ug 10 ka assists, si Jaylen Brown miiskor og 17, samtang si Daniel Theis miamot og 13 puntos ug 15 ka rebounds sa balanseng opensiba sa Celtics.

Nagkagidlay ang opensa sa Raptors nga mipasud lamang og 31 sa 84 nila ka itsa, 40 niini gikan sa 3-point area.

Mangtas gihapon ang Celtics bisan og wala ang usa nila ka star player nga si Gordon Hayward nga nagpaalim pa sa iyang injury.