GM Antonio, NM Enriquez, Nadera nanghawod na sab sa CEPCA online chessfest

CEBU, Philippines — Nanghawod na sab sila si Grandmaster Joey Antonio, National Master Rogelio Enriquez Jr. ug si Laila Nadera sa serye sa online tournaments nga gipasiugdahan sa Cebu Executives and Professionals Chess Association (CEPCA) niadtong weekend.

Ang 56-anyos nga si Antonio nga nakarepresentar sa Pilipinas sa World Chess Olympiad pipila ka higayon, maoy midominar sa ikaupat nga edisyon sa Jojo Dondon Super Blitz nga abli sa tanang players sa tibuok nasud.

Si Antonio mitapos uban ang 61 puntos, labaw lamang og duha ka lugas ni NM Zander Severino nga maoy mipahiluna sa ikaduhang dapit.

Ang varsity player sa Far Eastern University (FEU) nga si John Morazo maoy mi-okupar sa ikatulo bitbit ang 56 puntos ug gisundan kini nilang NMs Merben Roque ug Rommel Ganzon  nga dunay 54 ug 51 puntos.

Sa gihapon, sila si Enriquez ug Nadera mihimo og kasikas sa ilang kategoriya.

Sa Mr. Anonymous All-Cepcans/Ladies rapid event,  sila si Enriquez ug Antonio Cabibil parehong miposte og 6.0 puntos, apan si Enriquez maoy miangkon sa unang puwesto gumikan sa mas taas niyang tie-breaker.

Ang ikatulo ngadto sa ikalimang luna gi-okupar nilang Eden Diano, Dr. Leo Lofranco, ug Eladio Lim III. Naglangkob sa top 10 mao sila si Rosendo Yamyamin, Rey Flores, Jasper Montejo, Sheila Sepanton ug Laila Nadera.

Si Nadera nga miyembro sa Ateneo de Manila University women's varsity team, maoy gikoronahang hara sa Mr. Anonymous Cepca B/Ladies division blitz competition uban ang 32 puntos.

Sa Prexy Jerry Arena nga gisuportaan ni CEPCA President Engr. Jerry Maratas, si Eladio Lim III maoy naghari. Si Lim nagtabla ug si Kristine Lavandero nga mitali sab og 5.0 puntos, apan si Lim maoy nakadawat sa unang ganti tungod sa mas taas niyang tie-breaker.