MVP todo suporta ni Yulo

CEBU, Philippines — Nakaangkon og dugang motibasyon sa iyang kampanya sa Tokyo Olympics sunod tuig  ang Pinoy'ng gymnast nga si Carlos Edriel Yulo human ang Manny V. Pangilinan Sports Foundation mitunol og hinabang pinansiyal ngadto kaniya kagahapong adlawa.

Si MVPSF president Al Panlilio nagkanayon nga mihatag sila og dugang P800,000 nga pundo ngadto sa 19-anyos nga world champion aron kini tabangan sa iyang mga galastohan sa iyang training didto sa Japan.

“We at MVPSF just want to make sure we give out athletes like Caloy Yulo the best training possible even in these trying times,” matud pa ni Panlilio segun sa taho sa The Philippine STAR.

“Our chairman Manny V. Pangilinan also takes pride in taking care of our athletes and we follow his great example," dugang pa ni Panlilio.

Ang Philippine Sports Commission mao gyu'y nagpundo sa training ni Yulo sa Japan bisan pa man sa pinansiyal nga epekto ning pandemiya nga nakapaahat sa ahensiya pagputol sa allowance sa mga national team members ngadto sa katunga.

Si Yulo usa sa upat ka mga Pinoy nga kwalipikado na sa Tokyo Olympics. Ang laing tulo mao sila si pole vaulter EJ Obiena ug boxers Eumir Felix Marcial ug Irish Magno.

Apan nilang upat, si Yulo mao ang dunay dako'g  tsansa nga mohatag sa Pilipinas sa dugay na kaayo niining gihandum nga gold medal sa Olympics ilabi na kon susama ang porma nga iyang ipakita sa dihang nahimo siyang world champion sa miaging tuig didto sa Germany.