Jazz, Lakers nagmadaugon
CEBU, Philippines — Milansang og duha ka free throws si Rudy Gobert sa nahibilin nga 6.9 segundos sa duwa aron aswaton ang Utah Jazz ngadto sa 106-104 nga kadaogan batok sa New Orleans Pelicans sa labing unang duwa pagsugod og balik sa NBA kagahapon didto sa Walt Disney World sa Orlando, Florida.
Gihuman ni Gobert ang duwa bitbit ang 14 puntos ug 12 ka rebounds.
Gawas ni Gobert, mibida sab sa Jazz ang Fil-Am nga si Jordan Clarkson nga mipabuto og 23 puntos. Miabag kanila sila si Donovan Mitchell ug Mike Conley nga mitampo'g 20 puntos matag usa.
Ang Pelicans nga mao kanunay ang naglabaw sa halos tibuok nga bahin sa duwa ug sa usa ka higayon miabante og 16 puntos, duna pa unta'y tsansa nga modaog, apan igo lamang mihawok sa ring ang giitsa nga tres ni Brandon Ingram.
Si Ingram maoy nangu sa Pelicans uban ang 23 puntos.
Sila si JJ Redick ug Jrue Holiday nagkumboya'g 41 puntos sa pilderong Pelicans.
Miduwa man tuod ang star rookie sa Pelicans nga si Zion Williamson, apan limitado ang iyang oras.
Bisan pa man niini, nakaiskor gihapon siya og 13 puntos sud sa 15 minutos. Wala na siya mobalik pa sa korte sukad milingkod sa nahibilin nga 7:19 sa kulbahinam nga aksiyon. Sa laing duwa, si Anthony Davis mipatuasik og 34 puntos ug si LeBron James mipasud sa iyang basket sa nahibilin nga 12.8 segundos aron agakon ang Lakers ngadto sa kulbahinam nga kadaogan batok sa Clippers sa iskor nga 103-101.
Si James mitapos uban ang 16 puntos, 11 ka rebounds ug pito ka assists alang sa Lakers nga mipaduol ngadto sa paglangkat sa No.1 seed sa Western Conference. Si Kyle Kuzma miamot og 16 puntos.
Si Paul George mikadlit og 30 puntos, samtang si Kawhi Leonard mitali og 28 puntos alang sa Clippers nga wala makasustinir sa ilang kainit human milabaw og 11 puntos sa ikatulong kuwarter.
- Latest