Cebra mopahigayon refresher/seminar sa Toledo City
CEBU, Philippines — Ang Cebu Basketball Referee Association (CEBRA) mopahigayon og refresher/seminar sa mga reperi karong Sabado, Hulyo 25 didto sa Toledo City.
Magsugod kini sa alas-8 sa buntag ug mahuman sa alas-4 sa hapon didto sa Tubod Sports Complex sa maong dakbayan.
Gawas sa refresher, ang CEBRA mohimo sab og accreditation sa mga reperi sa Toledo aron mamahimong miyembro sa asosasyon.
Ang reperi sa Toledo nga pinangulohan sa ilang aktibong presidente nga si Ernesto Jaranilla maoy mihangyo nga mopa-akredit nila ni Cebu Schools Athletic Foundation, Inc. (CESAFI) head referee Edwin Dejacto Sr., CEBRA president Ed Aguelo ug Marlon Espante nga maoy mo-refresh sa mga reperi didto sa Toledo.
Gibana-banang moabot sa 25 ka reperi nga mosalmot sa usa ka adlaw nga accreditation.
"Dugay na ni sila sige'g hangyo namo niadto pang Marso, apan wala madayon tungod sa pagpatuman sa community quarantine gumikan sa coronavirus pandemic." Karon nga ang Toledo ubos na sa modified general community quarantine (MGCQ), idayon na gyud nila ang refresher/seminar," matud pa ni Dejacto.
Ang seminar ila sab nga gituyo aron makapili sila og potensiyal nga mga reperi para ila mapadagan sa CESAFI sunod tuig.
"Kasagaran gud sa senior referee edaran na, mao nga nangita mi og mga batan-on nga among build-apon. Kon makat-on na, puwede na nato padaganon sa CESAFI, dugang pa ni Dejacto.
- Latest
