Pacquiao andam kanunay moaway

CEBU, Philippines — Andam sa kanunay si WBA 'Super' welterweight champion Manny Pacquiao kon ugaling makahukom na kini nga mobalik og away.

Mao kini ang gipasalig sa iyang strength ug conditioning coach nga si Justin Fortune kay mao man kini ang nakita niyang kinaiya sa Pinoy ring star.

Dunay mga huhungihong nga si Pacquiao lagmit mosaka og balik sa ring sa dili pa matapos ang tuig.

Nadungan kini sa pamahayag ni Top Rank promoter Bob Arum nga gihikay niya sa kasamtangan ang sangka nilang Pacquiao ug sa wa'y pilde WBO welterweight champion Terence "Bud" Crawford nga plano niyang dad-on sa Bahrain.

Segun sa taho ni Quinito Henson sa The Philippine STAR, si Fortune nagkanayon nga nagpaabot na lang siya sa tawag kon maabot na ang panahon nga magsugod na sila og training.

Gipaneguro hinuon ni Fortune nga si Pacquiao nagpabiling aktibo ug anaa sa maayong kondisyon panahon sa kwarantin taliwala ning pandemiya.

“He can’t stay still, he’ll do something to keep fit, like what he’s doing in lockdown," matud pa ni Fortune. Kon ugaling makadesidir si Pacquiao nga mobalik og away karong Nobiyembre, gusto ni Fortune nga mopahigayon sila og mas taas nga training camp ilabi na kay si Pacquiao wala na makaaway sud sa dul-an usa na ka tuig.

"Just a little adjustment, maybe an extra week or two,” nagkanayon si Fortune.