Legendary Jazz coach Jerry Sloan namatay

CEBU, Philippines — Si Jerry Sloan nga migiya sa Utah Jazz sud sa 23 ka seasons atol sa iyang Hall of Fame coaching career sa wala pa miretiro niadtong 2011, mitaliwan ngadto sa laing kalibotan sa edad nga 78-anyos.

Duha ka higayon nga nahimong sakop sa NBA All-Star sud sa 11 ka tuig niyang pagduwa sa liga, si Sloan namatay gumikan sa komplikasyon sa Parkinson's disease ug Lewy body dementia nga iyang gibatokan sukad pa niadtong 2015.

Sa iyang karera isip player, si Sloan gikuha sa  Baltimore Bullets isip No. 4 overall pick sa 1965 NBA Draft. Nakaduwa siya og usa ka seaspn sa Bullets sa wala pa mitapon sa Chicago Bulls diin sila nagtinir sud sa usa ka dekada.

Sa talagsaon nga higayon, giretiro sa Bulls ang iyang No. 4 jersey niadtong 1978.

Human mi-coach sa Bulls sud sa duha ka tuig ug tunga niadtong 1979-1982, si Sloan nagsugod sa mabulukon niyang karera isip coach uban sa Jazz niadtong 1988.

Iyang gitimon ang Jazz ngadto sa 15 ka sunod-sunod nga pagtaak sa playoffs gikan niadtong 1989 ngadto sa 2003.

Uban sa dekalibreng pares nilang Karl Malone ug John Stockton, ang Jazz nakatagamtam sa labing nindot nilang season ubos ni Sloan niadtong 1996-1997 ug 1997-1998 seasons. Nakaabot sila sa NBA Finals, apan gisungag sa Chicago Bulls nga gipangulohan ni Michael Jordan.

Gitak-op ni Sloan ang iyang karera bitbit ang ikatulo sa labing daghan nga daog sa kasaysayan sa NBA (1,221-803) ug pito ka division titles.  Sa kinatibuk-an, nakataak sila sa playoffs 20 ka higayon.