PSC, POC pabor na ilipat sa 2021 ang Olympics

MANILA, Philippines— Pabor ang Philippine Sports Commission (PSC) at Philippine Olympic Committee (POC) na ilipat sa susunod na taon ang 2020 Olympic Games na nakatakda sanang idaos sa Hulyo 24 hanggang Agosto 9 sa Tokyo, Japan.

Ayon kay PSC chairman William “Butch” Ramirez, mas tama na i-urong ang quadrennial meet para masiguro ang kaligtasan ng lahat ng kalahok pangunahin na ang mga atletang sasabak.

“Pinakamagandang option yung Olympics sa 2021. Pangunahing concern talaga yung safety at health ng mga pupunta especially the athletes na nagsakripisyo ng ilang taon sa training,” ani Ramirez.

Nagulantang ang buong mundo sa pagkalat ng coronavirus (Covid-19) sa mahigit 150 bansa sa mundo kung saan lumampas na sa 13,000 katao ang namatay at mahigit 100,000 ang kasalukuyang ginagamot.

Halos lahat ng sporting events ay kanselado na maging ang NBA matapos tamaan ng virus ang ilang manlalaro nito gaya nina Rudy Gobert ng Utah Jazz at Kevin Durant ng Brooklyn Nets.

Naglabasan ang ilang ulat na desidido na ang International Olympic Committee (IOC) na kanselahin ang Tokyo Games.

Sumegunda si POC president Bambol Tolentino sa planong 2021 Olympics dahil mas maraming Pinoy athletes pa ang mabibigyan ng tsansang magkwalipika.

“It’s better to postpone the Tokyo 2020 Olympics rather than cancelation so as not to lose (Philippines) our chance for our first gold medal—or even more golds. More Filipinos have more chance to qualify,” ani Tolentino.

Magandang pagkakataon din aniya ito para mas makapaghanda ang mga atleta. Kaya’t perpekto ang 2021 para sa Tokyo Olympics.

“A postponement would mean more time to train for those who have already qualified and for those who are still trying to qualify. A 2021 schedule is ideal enough,” dagdag ni Tolentino.

Ito ang pinakamalakas na tsansa ng Pilipinas na makuha ang inaasam na gintong medalya.

Nariyan si Carlso Edriel Yulo na paboritong magwagi ng gintong medalya sa men’s floor exercise matapos pagharian ang naturang event noong 2019 FIG World Artistic Gymnastics sa Stuttgart, Germany.

Dalawang boksingero rin sa ngalan nina AIBA Men’s World Boxing Championships silver medallist Eumir Felix Marcial at Southeast Asian Games silver medallist Irish Magno ang pasok sa Tokyo Games kasama si SEA Games pole vault record holder Ernest John Obiena ng athletics.

Madaragdag pa sa listahan si Rio Olympic silver medalist Hidilyn Diaz na paborito ring magkampeon sa women’s weightlifting event.