Cebu City Sports Center abli gihapon sa publiko

CEBU, Philippines — Ang Cebu City Sports Center (CCSC) nagpabiling abli sa publiko, apan duna na'y pipila ka mga kalihukan niini nga gihunong samtang ang tibuok Probinsiya sa Sugbo gipaubos sa community quarantine.

Subay sa kamandoan sa kagamhanan sa Dakbayan sa Sugbo kabahin sa mga lakang nga pagahimuon aron malikayan ang pagkuyanap  sa  COVID-19 pandemic, magamit ang sports center gikan lamang sa alas-5 sa buntag ngadto sa alas-8 sa gabii hangtod nga mahuman ang quarantine period.

Ang training sa gymnastics temporaryo nang gihunong, samtang ang belly dancing gihuman sa miaging adlaw.

Ang mga zumba ug aerobics kutob na lang sab karong semana.

Bukas pa hinuon ang swimming pool ug ang oval. Sa dili pa ang swimmer makagamit sa pool, kinahanglan nga maligo usa sila alang sa saktong sanitasyon.

Sa oval, ang mga joggers nag-obserbar na og social distancing.

Duna sa'y pipila ka mga courts sa covered gym ang puwede magamit, apan kadtong  interesado kinahanglan unya nga mangutana  sa CCSC management aron pagseguro nga wala kini gigamit sa puwersa sa kapolisan sa kasamtangan.

"Gigamit ning holding area ang gym ron pero naa pa'y courts na magamit. But basin in a few days from now mas modaghan pa ning mga police dinhi," matud pa ni CCSC manager Jundel Bontuyan.

Gipasabot ni Bontuyan nga kinahanglan nilang abilihan ang sports center gumikan kay duna may mga Sugboanon ilabi na niadtong gipaubos sa rehabilitasyon ang nanginahanglan niini. Gawas pa, kinahanglan nga makakuha sila og pundo aron ikasuweldo sa ilang staff gawas nga gigamit kini nga holding area sa PNP.

"Kung magsira na pud mi ron, wala mi ikasweldo sa among tawo diri plus gihimo pud ning holding area ron sa mga police who are tapped to help in enforcing peace and order during the quarantine period from March 16 to April 14," sumala pa ni Bontuyan.