Half-baked mipakgang tulo ka daog sa 3coins sa Sunday.com season 6
CEBU, Philippines — Nabugto na ang nagkadinang tulo ka daog sa 3Coins dihang mikaging kini batok sa Half-Baked, 97-105 sa Sunday.com Season 6 basketball tournament niadtong Miyerkules diha sa Benedicto College gym sa A.S. Fortuna St., Mandaue City.
Human sa 27-25 nga bentaha sa first quarter, kontrolado na sa Half-Baked ang duwa, gani ang dos puntos nilang labaw ila pang gipaburot ngadto sa 78-69 paingon sa final period ubos sa pagpangulo ni Noval nga aduna kinatibuk-ang nakolekta nga 26 puntos.
Mikawat sab og salida silang Lino Martel ug Ian Cortes nga parehong miduslit og 23 puntos.
Apil sab nga misalida ang team owner nga si Ian Sampang nga miamot og 12 puntos. Misuporta sab si Jose Manzanares nga miambit og 11 puntos sa Half-Baked nga aduna na'y 2-2 win-loss record.
Ang 3Coins ni Ray Neiz gipangulohan ni JC Entrampas nga miantog og 20 puntos, gisundan ni Topher Zambo nga adunay 17 puntos ug Jaypril del Castillo sa iyang 15 puntos.
Sila si Cañas ug Hernan Omolon nagkumbinar og 22 puntos sa pilderong 3Coins.
Napilde man tuod, apan ang 3Coins nag-una gihapon sa standing uban sa reigning champion Bulldog ug Unisol nga nagbitbit og 3-1 nga baraha.
Ang Unisol nakamugna og triple-tie human midaog sa Yamaha, 115-102.
Mipakitang gilas si Rex Tuazon ug gipangulohan ang Unisol pinaagi sa iyang 26 puntos. Sila si JR Dela Peña mikulit og 23 puntos, si Herben Inigo miamot og 20 puntos, si Leoje Gela miambit og 17 puntos ang si Mantuhac mitusak og 13 puntos sa team ni John Paul Espija nga nakalabang sa lawod sa kalisdanan.
Ang Unisol maoy pirmeng naggukod gikan sa pagsugod ug diha na sila nakarekober sa fourth quarter dihang nagpauwan kini og mga puntos nga nakabaraw sa gihandom nga daog sa Yamaha.
Sila si Harlie Vergacer ug JR Castro miratsada og 21 puntos aron pangulohan ang Yamaha ni Alfred Pasana nga duna na karo'y 2-2 nga baraha ning tinuig nga liga nga nahimo pinaagi sa mga paningkamot sa presidente niining si Tata Nadera ug ballclub adviser Atty. Sally Malig-on.
PUNTOS MATAG USA
Unang duwa:
HALF-BAKED (105) – Noval 26, Martel 23, Cortes 23, Sampang 12, Manzanares 11, Remulta 9, Solon 7, Soon 5.
3COINS (97) – Entrampas 20, Zambo 17, Del Castillo 15, Cañas 12, Omolon 10, Manatad 6, Neiz 6, Malakhooti 4,
Rapayla 4, Saludares 2, Lapinid 1.
Ikaduhang duwa:
UNISOL (115) – Tuazon 27, Dela Peña 23, Inigo 20, Gela 17, Mantuhac 13, Tabar 9, Espija 4, Flamania 2.
YAMAHA (102) – Vergacer 21, Castro 21, Espinosa 20, Pasana 10, Soco 9, Tirado 8, Laurence 7, Mejares 6.
- Latest