Team Philippines gagawaran ng PSA Athlete of the Year trophy

MANILA, Philippines — Pormal na pararanga­lan ngayong gabi ang Team Philippines matapos ang pagdomina sa nakaraang 30th Southeast Asian Games.

Igagawad ng Philippine Sportswriters Association (PSA) ngayong gabi ang Athlete of the Year trophy sa delegasyong pinamumunuan nina world champion at double gold winner Carlos Yulo, women’s world boxing champion Nesthy Petecio at Olympic silver medalist Hidilyn Diaz.

Ang Team Philippines ang mangunguna sa listahan ng mga sports stars at personalities na pararangalan sa SMC-PSA Annual Awards Night sa Centennial Hall ng Manila Hotel.

Sasamahan nina Philippine Sports Commission (PSC) chairman William ‘Butch’ Ramirez, Philippine Olympic Committee (POC) president Abraham ‘Bambol’ Tolentino, International Olympic Committee (IOC) representative to the country Mikee Cojuangco Jaworski at Deputy House Speaker at NorthPort team owner Mikee Romero ang pinakamatandang media organization sa pamumuno ng presidente nitong si Tito S. Talao, ang sports editor ng Manila Bulletin, sa pagkilala sa mga atletang nagbigay ng karangalan sa bansa sa nakaraang taon.

Ang 65-anyos na si billiards legend Efren ‘Bata’ Reyes, bahagi ng Filipino delegation sa 2019 SEA Games, ang magiging special guest speaker sa gala night na inihahandog ng PSC, MILO at Cignal TV.

Ibibigay din sa legendary pool icon ang Lifetime Achievement Award ng Philippine sportswriting fraternity.

Ang record medal haul na 149 golds, 117 silvers at 121 bronzes ang nagbigay sa host country ng overall title sa biennial meet na pinamahalaan ng bansa.

Tatanggapin ng Team Philippines ang Athlete of the Year trophy sa two-hour program na suportado rin ng Philippine Basketball Association, AirAsia at Rain or Shine.

Bibigyan naman ng citations ang lahat ng gold medal winners na bahagi ng halos 200 awardees na bumubuo sa 2019 honor roll list.