Heat mipakurat sa Bucks

CEBU, Philippines – Giangkon sa Miami Heat ang dungog isip labing unang team nga nakapilde sa haring gangis nga Milwaukee Bucks sud sa duha ka higayon ning NBA season.

Sila si Jae Crowder ug Jimmy Butler parehong mitali og 18 puntos, samtang si Goran Dragic miamot og 15 puntos sa dihang gipakuratan sa Heat ang Bucks, 105-89.

Miamot si Bam Adebayo og 14 puntos ug 13 ka rebounds, samtang sila  si  Kendrick Nunn ug Kelly Olynyk nagkumboya'g 24 puntos alang sa Heat nga miinat sa ilang record ngadto sa 39-22.

Ang Heat wala na molingi pa sukad miposte og 81-70 nga labaw padung ngadto sa katapusang kuwarter.

Gawas sa mainit nilang opensa, milampos sab ang Heat pagpugong sa alas sa Bucks nga si Giannis Antetokounmpo nga ilang gilimitahan ngadto sa 13 puntos human mipasud lang og unom sa 18 niini ka itsa.

Si Brook Lopez mibahog og 21 puntos alang sa Bucks nga napilde sa ikasiyam pa lamang nga higayon sud sa 61 ka duwa.

Sila si Khris Middleton ug Donte DiVincenzo nagkumboya og 23 puntos sa Bucks nga napukan man tuod, apan mao gihapon ang nagkupot sa labing nindot nga rekord sa liga sa ilang 52-9 nga baraha.

Sa laing duwa, si rookie guard RJ Barrett miratsada og 27 puntos aron pangulohan ang New York Knicks nga mipahagba sa inilog nga Houston Rockets, 125-123.

Nagparamdam sab si Julius Randle nga mihipos og 16 puntos ug 16 sab ka rebounds alang sa Knicks nga mikolapso

human makalabaw og 21 puntos. Nakabangon ra sab dayon ang Knicks aron maeskapo uban ang  dos puntos nga daog.

Gumikan sa ilang kadaogan, giputol sa Knicks ang siyam ka sagunson nilang pilde batok sa Rockets didto sa ilang korte.

Gawas niiini, ila sab nga gipakgang ang unom ka sunod-sunod ka daog sa Rockets.

Duna pa unta'y tsansa ang Rockets nga makapuwersa og overtime, apan nasipyat ang tira ni Russell Westbrook dayong kapupos sa oras.

Si James Harden maoy nangu sa Rockets uban ang 25 puntos ug walo ka assists, samtang si Westbrook mihipos og 24 puntos ug siyam ka rebounds.