Orcollo sinargo ang korona ng Diamond Bank Pool event
MANILA, Philippines — Nakumpleto ni dating world champion Dennis Orcollo ang matamis na sweep sa lahat ng kanyang asignatura upang masungkit ang korona ng Diamond Bank Pool event ng prestihiyosong 2020 Derby City Classic na ginanap sa Caesars Southern Indiana Casino and Hotel sa Elizabeth, Indiana, USA.
Hindi nakaporma kay Orcollo ang mga karibal nito kabilang na sina 2019 Diamond Bank Pool champion Billy Thorpe ng Amerika at Evan Lunda ng Amerika sa final round ng event na nilahukan ng 451 players.
Kasama rin sa mga tinalo ni Orcollo sina Filipino-Canadian Alex Pagulayan, dating world champion Shane Van Boeing ng Amerika at Jayson Shaw ng Scotland gayundin sina Tim De Ruyter, Shannon Murphy, Billy Young, Jeremy Jones David Adams, Mieszko Fortunski, Gary Urinoski, Kenny Wilson at kababayang si James Aranas.
Napasakamay ni Orcollo ang $16,000 premyo, habang nagkasya sa runner-up si Lunda para maiuwi ang $8,000 konsolasyon.
Pumangatlo si Thorpe para sa $5,350.
Ito ang ikalawang Diamond Bank Pool crown ni Orcollo matapos pagharian ang 2014 edisyon.
Dahil dito ay lumakas ang tsansa ni Orcollo na masungkit ang Master of the Table kung saan $20,000 ang nakaabang na premyo matapos ang apat na events.
May 120 points siya sa Diamond Bank Pool.
Sunod na magtatangka si Orcollo kasama ang iba pang Pinoy cue masters sa Diamond 9-Ball Pool event.
Pakay ni Orcollo na mabawi ang korona sa 9-Ball na huli niyang nahawakan noong 2017.
Dalawang beses nang nagkampeon si Orcollo sa 9-Ball.
Maliban sa 2017 edisyon ay nangibabaw din si Orcollo noong 2011.
- Latest