LeBron miinat sa iyang labaw
CEBU, Philippines — Giinat ni Los Angeles Lakers superstar LeBron James ang iyang labaw sa NBA All-Star Game fan balloting ngadto na sa 149,564 botos batok sa karibal niya sa Western Conference nga si Luka Doncic sa Dallas Mavericks.
Gumikan niini, nagkahayag na nga sila si James ug Giannis Antetokounmpo sa Milwaukee Bucks maoy mahimong team captains sa tagsa-tagsa nila ka mga kampo sa giatngan nga 69th NBA All-Star Game karong Pebrero 16 didto sa Chicago.
Sa miaging tuig, sila gihapon maoy nagkupot sa maong papel diin gipukan sa Team LeBron ang Team Giannis, 178-164.
Sa labing uwahing ihap, si James maoy nakaangkon sa labing taas nga boto nga miabot ngadto sa 4,747,887, samtang si Antetokounmpo maoy nanghawod sa East uban ang 4,474,107 botos.
Sa pagdominar nila sa botasyon, sila si James ug Antetokounmpo mao ang dunay katungod mopili kon kinsay gusto nilang ikauban sa ilang team.
Si James ug ang iyang teammate sa Lakers nga si Anthony Davis ug Kawhi Leonard sa LA Clippers segurado nang maapil sa West All-Stars ingon man sila si Doncic ug James Harden sa Houston Rockets.
Samtang si Antetokounmpo duyogan nilang Pascal Siakam sa Toronto Raptors, Joel Embiid sa Phildelphia 76ers, Jimmy Butler sa Miami Heat, Trae Young sa Atlanta Hawks, Kemba Walkers sa Boston Celtics ug Kyrie Irving sa Brooklyn Nets sa East All-Stars.
- Latest