Jazz nakasagunson siyam ka daog

CEBU, Philippines — Ang Utah Jazz mitala sa ikasiyam nilang sagunson nga daog pinaagi sa pagpilde sa Washington Wizards, 127-116 sa NBA kagahapon didto sa  didto sa Capital One Arena sa Washington, DC.

Si Bojan Bogdanovic mipabuto og 31 puntos , samtang si Rudy Gobert miamot og 21 puntos ug 14 ka rebounds alang sa Jazz, kansang unom ka players mikadlit og double figures aron inaton ang ilang record ngadto sa 27-12.

Wala sab magpa-alkansi sila si Jordan Clarkson ug Joe Ingles nga nagkumbinar og 43 puntos alang sa Jazz nga nakadaog og 14 sa miagi nilang 15 ka duwa.

Ang Wizards igo lamang nakasikit ngadto sa tres puntos gumikan kay si Gobert mihansak sa bola sud sa duha ka sunod-sunod nga higayon nga nakapalagsik og balik sa Jazz dayon na ngadto sa pagkab-ot og 11 puntos nga kadaogan

Nagmalampuson ang Jazz bisan og wala ang usa nila ka bitoon nga si Donovan Mitchell nga wala makaduwa sa labing unang higayon karon nga season gumikan sa injury.

Si Bradley Beal dunay 25 puntos, samtang sila si Davis Bertans, Jordan McRae ug Ian Mahinmi nagkumboya'g 49 puntos alang sa Wizards nga napukan sa ikaduhang higayon sa katapusan nilang lima ka duwa.