Super rookie wala gihapon makaduwa
CEBU, Philippines — Gihangyo sa New Orleans Pelicans ang ilang mga fans nga patas-an ang ilang pasensiya human sa sunod-sunod nilang kapildihan ug sa wala pagduwa ni super rookie Zion Williamson.
Si Williamson wala pa kapakita og aksiyon sa iyang unang regular season game sa NBA human makaangkon og injury niadtong Oktubre 21 atol sa team practice.
Ang vice president sa Pelicans nga si David Griffin nagkanayon nga dili sila gusto nga iahat og paduwa si Williamson nga wala pa hingpit maalim ang injury sa tiil niini.
Ang Pelicans nga adunay 6-19 win-loss record, gikinahanglan og player nga makapabuhi sa ilang kampanya karon nga season.
Mismo si Pelicans coach Alvin Gentry ang miingon nga wala siya'y ideya kon kanus-a paduwaon sa koponan si Williamson. Si Williamson wala pa kabalik sa team practice.
Sa wala pa ang season, daghan ang mihulagway ni Williamson nga umaabot nga franchise player sa Pelicans hulip ni Anthony Davis nga atua na sa Los Angeles Lakers.
- Latest
