Bucks nagpabiling mangtas

CEBU, Philippines — Giinat pa sa Milwaukee Bucks ang nagkadina nilang daog ngadto sa 12 bugti sa ilang paglubong sa New York Knicks,132-88 sa NBA kagahapon didto sa Fiserv Forum sa Milwaukee, Wisconsin.

Si Giannis Antetokounmpo miiskor og 29  aron pangulohan ang Bucks nga  wala mipakita og kaluoy ngadto sa labing bati nga koponan sa ilang dibisyon gumikan kay padayon nilang gilubong ang Knicks human sila miposte og 33-15 nga labaw sa first period.

Wala kaayo mahago si Antetokounmpo nga miduwa lamang sud sa 21 puntos diin siya milangkat og 15 ka rebounds ug mipasud og 10 sa 14 niya ka itsa.

Ang gikahadlokang 'Greek Freak' giabagan ni Khris Middleton nga dunay 16 puntos ug ingon man ni D.J. Wilson  sa iyang og 19 puntos.

Sa kinatibuk-an, unom ka players ang mikadlit og double figures, apil na ang maguwang ni Antetokounmpo nga si Thanasis, kinsa mitali og 10 puntos sud sa 12 minutos alang sa Bucks nga padayong naghari sa Eastern Conference bitbit ang 18-3 record. 

Didto sa Wells Fargo Center, si Tobias Harris mitimbre og 26 puntos ug si Joel Embiid mipuntos og 16 uban ang 11 ka rebounds sa dihang gipakaging sa Philadelphia 76ers ang Utah Jazz, 103-94.

Gumikan niini, ang Sixers nagpabiling wa'y pilde sud sa 10 ka duwa didto sa ilang korte karon nga season. Sa kinatibuk-an, nagkupot sila og 15-6 nga baraha nga maoy ikalima nga labing nindot sa Eastern Conference.

Sa Atlanta, nagpadayong ang miserableng salida sa Golden State Warriors human sila kuniniti sa Hawks, 104-79.

Si Trae Young maoy nangu sa Hawks uban ang 24 puntos, samtang sila si De'Andre Hunter ug Damian Jones nagkumbinar og 34 puntos.