May game 3! SBU humirit ng Do-or-Die
MANILA, Philippines — Naisalba ng MVP na si Calvin Oftana ang top seed San Beda Red Lions kontra sa Letran Knights, 79-76 kahapon upang humirit ng do-or-die battle sa kanilang best-of-three Finals series ng Season 95 NCAA men’s basketball tournament sa MOA Arena sa Pasay City.
Abante pa ng dalawang puntos ang Letran, 76-74 sa fall-away jumper ni Larry Muyang, ngunit umarangkada si Oftana ng drive at nakakuha ng foul mula kay Bonbon Batiller para sa three-point play upang bawiin ang bentahe 77-76 mahigit 19.1 segundo na lang ang nalalabi.
Matapos magmintis si Batiller sa return play dumayo naman si James Kwekuteye sa free throw line sa foul ni Muyang para sa final score.
Tumapos ang Fil-Canadian na si Kwekuteye ng 21 puntos, pitong rebounds at anim na assists habang si Oftana ay umani ng 17 puntos, 11 rebounds at dalawang assists at 17 puntos din mula kay Clint Doliguez para sa Red Lions na dadaan sa winner-take-all match sa Finals sa unang pagkakataon sa loob ng tatlong seasons.
Maghaharap muli ang magkaribal na San Beda at Letran sa Martes para pag-agawan ang titulo sa Game 3 ng serye sa parehong venue.
Sa juniors’ division, bumawi naman ang Lyceum Junior Pirates kontra sa San Beda Red Cubs, 79-74 upang humirit ng rubber match sa kanilang best-of-three Finals series.
Samantala, dinomina ng Lions ang Mythical Five sa pangunguna ni MVP Oftana sa individual awarding rites bago nag-umpisa ang Game 2 ng Finals.
Napili rin si Cameroonian import Donald Tankoua bilang Best Foreign Player at si Justine Arana ng Arellano Chiefs bilang Rookie of the Year at si Fran Yu ng Letran naman ang Most Improved Player.
- Latest
