Donaire miyukbo ni Inoue

CEBU, Philippines — Si Nonito "The Filipino Flash" Donaire Jr. mipakita og igong kadasig, kaisog ug kasingkasing, apan dili kini igo hinungdan nga napukan siya pinaagi sa unanimous decision batok sa gikaintapang Hapon nga kampiyon nga si Naoya Inoue sa ilang bantamweight unification bout nga nagsilbe sab nga finals sa World Boxing Super Series (WBSS) niadtong Huwebes sa gabii didto Saitama Super Arena sa Saitama, Japan.

Usa ka eksplosibo ug hugtanong binukbukay ang gipakita sa duha ka banggiitang mga boksidor sa tibuok 12 ka hugna nilang kumbati nga lagmit maoy ibayaw nga "Fight of the Year" sa boksing ning 2019.

Ang 36-anyos nga si Donaire nga mikatkat sa ring isip WBA bantamweight champion, dalaygon kaayong mibangon human matumba sa ika-11 nga hugna.

Nakalahutay man tuod si Donaire sa maong makuyaw nga sitwasyon, apan napakyas gihapon siya sa iyang tinguha sa kinauwahian gumikan kay si Inoue bagsik sab kaayo ug mipakita sa hait niyang kalibre aron sementuhon ang iyang pangan isip usa sa labing mangtas nga pound-for-pound boxers karon sa tibuok kalibotan.

"This fight showed my real strengths and weaknesses," matud pa ni Inoue. "After a year of fights, I'm satisfied to win this championship."

Ang tulo ka mga judges miiskor og 116-111, 114-113 ug 117-109 alang ni Inoue nga wala lamang mihiusa sa IBF ug WBA bantamweight titles, apan mihimo sab og kasaysayan isip labing unang Hapon nga misakmit sa Muhammad Ali trophy uban ang $1 million nga ganti isip kampiyon sa WBSS.

Dili sab hinuon lalim ang naagian sa 26-anyos nga si Inoue gumikan kay sa ikaduhang hugna pa lamang nakahiagum na siya og gisi sa ibabaw nga bahin sa tuo niyang mata human maigo sa hagpok nga left hook ni Donaire.

Kontrolado kaayo ni Donaire ang away hangtod sa ikalimang hugna sa dihang si Inoue nakalandig og makabungog nga right hook ngadto sa apapangig ngadto sa Pinoy'ng kampiyon.

Sa kinatibuk-an, si Inoue maoy mas bangis, mas agresibo ug mas determinado hinungdan nga gidominar niini si Donaire,  usa ka four-division world champion.

Gumikan sa iyang kadaogan, si Inoue miinat sa wa'y pilde niyang record ngadto a 19-0 uban ang 16KOs, samtang si Donaire nadakin-as ngadto sa 40-6 uban ang 26KOs.