Pacquiao misuspenso team sa MPBL
CEBU, Philippines – Gipakita ni Senator Manny Pacquiao nga mao sab ang founder sa Maharlika Pilipinas Basketball League (MPBL) nga tinud-anay ang iyang bahad nga mopahamtang og silot sa mga magdala og lawgaw sa iyang liga.
Si Pacquiao wala magduha-duha sa pagsuspenso sa tibuok team sa SOCSARGEN human mapamatud-i nga nalambigit sa 'game-fixing' o ang tuyo nga pagbaligya sa duwa.
"This should serve as a serious reminder to all other teams in the MPBL that we are intolerant to any form of cheating and other unsportsmanlike behavior. We formed MPBL precisely to promote fair play in basketball so I don't want to hear anything that would besmirch the name of the league," matud pa sa opisyal nga pamahayag ni Pacquiao.
Si Pacquiao uban sa abag ni MPBL commissioner Kenneth Duremdes midangop sa National Bureau of Investigation (NBI) aron imbestigahan ug masakpan ang mga koponan nga nalambigit sa mga panikas.
Wala hinuon gipabungkag ni Pacquiao ang koponan, apan giklaro niya nga dili na makabalik sa liga ang mga direktang nalambigit sa tikas lakip na ang mga officials ug players.
- Latest
