Quickserver, Rongcales mitiklo sa ilang kontra

CEBU, Philippines — Sa talagsaong higayon, ang Quickserver ug Rongcales parehong miiskor og 102 nga kadaogan batok sa tagsa-tagsa nilang kaatbang sa Aduana Basketball Club Cebu (ABCC) Season 2 Inter-Brokerage Cup 2019 niadtong Martes diha sa CPA gym sa north reclamation area.

Ang Quickserver Customs Brokerage milubong sa Alas Logistics Corp., 102-86 ug gilubong sab sa Rongcales Customs Brokerage ang SMS Customs Brokerage,102-70.

Maayo kaayong pagkabahin-bahin ang puntos sa Quickserver ni playing coach Bruce 'The Captain' Inopiquez diin unom sa 10 ka players niya nga nakaiskor ang mitala og double figures.

Gipangulohan kini ni Genson Antolijao nga mipabuto og 22 puntos uban ang duha ka rebounds ug tulo ka assists. Si Antolijao nga maoy best player nakakuha sab og igong suporta gikan nilang Alex Plando, Jollebee Labor ug Ramel Aniñon nga nagtampohay og 12 puntos. Sila si Jonnas Cayanong ug Kikoy Castro nagkumboya'g 21 puntos sa Quickserver nga nagsolo sa ikaduhang dapit sa bracket B standings sa ilang 4-1 nga baraha ug tataw nang makasud sa crossover quarterfinals.

Nausik ang 27 puntos ni Ryan Saavedra kay ang Alas  nakatilaw sa ikalima niining pilde batok sa usa ka daog. Si Josephus Ryan Zafra mitikdol og 16 puntos, samtang sila si Exier Alejano ug Marvin Sillar mitimbre'g 13 ug 10 puntos sa Alas.

Sa laing bahin, si Geomar Caynila miiskor og 18 puntos, tulo ka rebounds ug duha ka assists aron pangulohan ang Rongcales (4-2) pagpahimutang sa   ikatulong dapit.

Si Ladie Bacor mitampo og 13 puntos, si Radnie Rivera miabuno'g 12 puntos, samtang ang team owner nga si Richard Rongcales mitampo'g 11 puntos.

Upat sab ka SMS players ang mikamada og double figures ubos sa pagpangulo ni Javier Deniega nga miduslit og 22 puntos.

Laing naka-double digits mao si Mark Guardiano nga midagkot og 13 puntos, James Jordan adunay 11 puntos ug Nelyoung Villacampa sa iyang 10 puntos.

Ang SMS mitampos sa liga nga walay bisan usa na lang ka daog nahagdaw sa unom nila ka mga duwa.

Ang mga duwa sa FYA Season 24 ubos sa superbisyon ni league commissioner Sidney Ganapin.

Puntos matag usa

Unang duwa:

RONGCALES (102) – Caynila 18, Bacor 13, Rivera 12, Rongcales 11, Daculan 9, Cabrera 8, Valenzuela 8, Batiller 4.

SMS (70) – Deniega 22, Guardiano 13, Jordan 11, Villacampa 10, Jim 8, Espina 2, Bayer 2.

Ikaduhang duwa:

QUICKSERVER (102) – Antolijao 22, Plando 12, Labor 12, Aniñon 12, Cayanong 11, Castro 10, Inopiquez 8, Tacorong 8, Inhambre 6, Soco 3.

ALAS (86) – Saavedra 27, Zafra 16, Alejano 13, Sillar 10, Agustinez 8, Estillore 8, Ciabo 4.