Parks balhin sa TNT
CEBU, Philippines — Natay-og ang kalibotan sa PBA human gipahibalo sa Blackwater Elite nga ilang gibuhian ang super rookie nga si Ray Parks Jr. ug gi-trade ngadto sa TNT KaTropa bugti sa duha ka players ug duha ka future draft picks.
Si Parks nga maoy leading scorer sa Blackwater mihimo sa katapusang duwa niya uban sa koponan niadtong Miyerkules diin napilde sila sa Barangay Ginebra Kings, 93-101.
Ang kadagkoan sa Blackwater miingon nga miuyon na sila sa trade deal ug nakita nila nga dili sila alkanse tungod kay makadawat sila sa bigmen nga sila si Don Trollano ug Anthony Semerad gikan sa TNT. Sila na usab ang manag-iya sa duha ka first round draft picks sa KaTropa.
Dili pa hinuon matawag nga opisyal ang maong trade deal tungod kay sa Lunes pa ang pagbalik sa opisina sa PBA, apan ang kadagkoan sa duha ka koponan positibo nga aprobahan kini ni PBA Commissioner Willie Marcial.
Sa wala pa siya misud sa PBA, si Parks una nang mipadayag nga gusto nga og mga dagkong team franchise sama sa TNT ug San Miguel Beermen.
Si Parks mi-average og 20 puntos sa iyang pagduwa kapin sa usa ka conference. Wala siya miduwa sa All-Filipino Cup kay gitiwas niini iyang kontrata uban sa Alab Pilipinas sa ABL.
- Latest