Daog na gyudang warriors

CEBU, Philippines —Nakabangon na gyud ang Golden State Warriors  gikan sa duha ka sunod-sunod nga pilde dihang ilang gilat-an ang New Orleans Pelicans, 134-123 sa NBA kagahapon didto sa Smoothie King Center.

Mikadlit og 26 puntos si  Stephen Curry   ug mipasa og 11 ka assists, samtang si Draymond Green mirehistro og triple-double aron tabangan ang Warriors pagbangon gikan sa duha ka mapait nga kapildihan.

Gikastigo sa Oklahoma City Thunder, 120-92, niadto lamang Domingo, daw sa nabanhaw ang kamangtas sa Warriors  ug giluglog nila ang Pelicans.

Ang Warriors mirapido og 45 puntos sa ikaduhang kuwarter dayon na sa pagrehistro og 72-55 nga labaw sa halftime. Mao kini ang nahimo nilang yawi ngadto sa paglubong og 11 puntos sa Pelicans.

Gawas ni Curry, misalida sab si Green nga mikamada og 16 puntos, 17 ka rebounds ug 10 ka assists. 

Dako sab og natabang si D'Angelo Russell nga mitapos uban ang 24 puntos, pito ka rebounds ug walo ka assists.

Si Brandon Ingram maoy nangu sa Pelicans uban ang 27 puntos.

Didto sa Houston, si James Harden mipabuto og 40 puntos, pito ka assists ug tulo ka rebounds sa dihang gipakaging sa Rockets ang Oklahoma City  Thunder sa iskor nga 116-112.

Misalida sab ang iyang sidekick nga si Russell Westbrook nga mikolekta og 21 puntos, 12 ka rebounds ug siyam ka assists.

Sa laing aksiyon, ang Philadelphia 76ers mao na lang ang bugtong team sa Eastern Conference nga wala pa'y pilde human gihimulbolan ang Atlanta Hawks alang sa ikatulo nilang sagundon nga daog ubos sa pagpangu ni Joel Embiid  nga mikamada og 36 puntos.

Didto sa Toronto, ang defending champion Raptors miinat sa ilang record ngadto sa 3-1 human gibuntog ang Orlando Magic, 104-95. Sila si Kyle Lowry ug Pascal Siakam nagkumbinar og 50 puntos sa Raptors.

Sa West, si DeMar DeRozan mitimbre og 27 puntos alang sa San Antonio Spurs nga mao na lang ang wa'y pilde sa ilang dibisyon human makaipsot batok sa Portland Trail Blazers sa iskor nga 113-110.