Philippine Team gilantaw molambo sa SEA Games

CEBU, Philippines — Gaawas-awas karon ang kompiyansa sa kadagkoan sa Philippine sport nga makab-ot ang  ilang misyon nga mosulod sa top three overall sa Southeast Asian Games nga sugdan sunod bulan diin ang Pilipinas usa sa mga host.

Ang mga opisyal sa Philippine Sports Commission  (PSC) ug Philippine Olympic Committee (POC) salig  nga molambo pa unya ang Pilipinas sa SEA Games tungod  sa sunod-sunod nga pagpakita sa mga atletang Pinoy sa ilang abilidad.

Niadtong Domingo, duha ka atletang Pinoy ang naghari sa world championships  nga sila si Carlos Yulo sa gymnastics ug  Nesthy Petecio sa boxing event.

Si Yulo mihimo og kasaysayan isip labing unang Pinoy nga misakmit og gold sa Gymnastics World Championships didto sa Germany, samtang si Petecio misakmit sa gold medal sa 2019 AIBA Womens World Boxing Championships human niya gipilde pinaagi sa unanimous decision ang Russian nga si Liudmila Vorontsova.

Tungod niini, si PSC chairman William Ramirez mihingusog karon sa suporta alang sa   preparasyon sa Phl team. Mimando usab siya sa paghatag og cash incentives sa mga atleta nga unang mihatag og dungog sa nasud aron mas madasig sila atol sa SEA Games.

Gawas sa duha, una na usab nga mipakita sa ilang abilidad ang pole vaulter nga si Ernest Obiena, ang labing unang Pinoy nga mi-qualify alang sa 2020 Olympics.  Midaog usab og silver medal ang veteran nga si Eumir Marcial sa AIBA World Cup sa miaging bulan.