Red team hari sa ABC category

CEBU, Philippines – Ang Team Red nagsandig sa 46 puntos nga eksplosyon ni Jon Haniel Abinales aron pagtipi sa White, 85-82 ug langkaton ang korona sa All Barangay Council (ABC) category sa 10th Mayor Alegado Cup Inter-Barangay Fiesta Basketball League niadtong Lunes didto sa Consolacion Sports Complex.

Sila si Carlos Donn Flores ug Neil Congson mitali og 16 puntos matag usa alang sa Red nga nanglimbasog og maayo sa endgame alang sa ilang og tres puntos nga  daog.

Si Abinales maoy gibayaw nga Finals MVP, samtang si Francis Neil Borces sa White ang MVP sa regular season.

Si Borces miratsada og 33 puntos sa pilderong White.

Sa sangka alang sa ikatulong dapit, sila si Earl Jhun Codeniera, Dennis Balaba ug Reswin Bihag nagkumboya og 49 puntos aron aswaton ang Yellow ngadto sa kulbahinam nga daog batok sa Blue, 77-75.

Mikuha sab og atensiyon ang Rico's Catering ug SPEAK.

Luyo sa paningkamot nilang Clarkrence Bongo ug Romar Mag-asin nga mihipos og 23 puntos, ang Rico's Catering mitiklo sa SF-Basketball, 43-28  aron sakmiton ang titulo sa little mini (13-under) category, samtang sila si Lester Cañete ug Vince Luke Daclan miiskor og 44 puntos alang sa SPEAK nga maoy miangkon sa korona sa mini (16-under) division human nakaeskapo batok sa Poblacion Occidental, 71-70.

Si Bongo sa Rico's Catering maoy ginghanlan nga 13-under MVP, samtang si Cañete sa SPEAK maoy mialsa sa 16-under MVP trophy.