Blackwater moharong sa TNT Katropa

CEBU, Philippines – Ihurot sa Blackwater Elite ang tanan nilang kusog sa depensa aron mapugngan ang kanhi NBA standout ug karon import sa TNT KaTropa nga si KJ McDaniels atol sa ilang duwa sa PBA Governors   Cup  didto sa Smart Araneta  Coliseum.

Ang Blackwater makigharong  sa  KaTropa  sa alas-4:30  sa hapon.

Ang kanhi Houston Rockets high-flyer nga si McDaniels mopakita na sa iyang katakus sa PBA. Si  McDaniels miuban og duwa sa KaTropa sa torneyo didto Macau sa miaging semana diin siya mi-average  og dul-an 40 puntos. 

Wala hinuon siya makatabang sa KaTropa nga makasud sa playoffs sa maong torneyo, apan napakita ni McDaniels ang iyang talagsaong abilidad sud sa korte.

Mismo si Blackwater coach Aris Dimaunahan miangkon nga lisud pugngan si McDaniels sa opensa. 

Gawas sa presensiya ni McDaniels, nakadugang sab sa problema ni Dimaunahan mao ang injuries sa iyang import nga si Aaron Fuller ug star player nga si Ray Parks Jr. Wala pa'y seguro kon pasudlon ba sa  korte  ang  duha karon.

Sa  main game sa alas-7 sa gabii, ang San Miguel Beermen mosugod na sa ilang kampanya  alang sa ilang grandslam championship batok sa Phoenix Fuel Masters sa alas-7:30 sa gabii.