Cabangahan nanUktok sa semis; David Justin 2-0 na sa 10th Alegado Cup

CEBU, Philippines – Mipabuto og 38 puntos si Brevin Keith Padayogyog sa dihang ang Cabangahan nakasugakod batok sa Casili, 79-75 alang sa ikaduha nilang sagunson nga daog sa SK Juniors Category A sa 10th Mayor Alegado Cup Inter-Barangay Fiesta Basketball League didto sa Consolacion.

Wala sab magpa-alkansi sila si Dexter Panangin ug Johanne Francis Panangin nga nagkumboya'g 30 puntos ug ingon man si Dave Ryan Miñoza nga mitali og 13 puntos alang sa Cabangahan nga nanginahanglan na lang og usa ka daog aron mo-abante sa semifinal round.

Nanuktok sab sa semis ang Cabangahan sa midgets Category A bitbit ang 2-0 nga baraha human gitumba ang Lamac, 56-50 luyo sa 28 puntos ni James Devila.

Dako sab og naambag sila si Hever John Oquias ug Adrian Jay Panangin sa Cabangahan dihang nagkumboya sila og 34 puntos.

Sa Seniors Category A, ang Poblacion Oriental mipaduol sab og maayo sa semis human nakaeskapo bitbit ang 65-63 nga kadaogan batok sa Nangka.

Si Larry Malagar maoy nangu sa Poblacion Oriental uban ang 26 puntos, samtang ang iyang igsuon nga si Lemuel Malagar mitali og 13 puntos

Sa open category, ang David Justin ni team owner Dennis Maglasang mihakot sa ikaduha nilang sunod-sunod nga daog human gipiog ang Team Saritha, 86-80.

Si Rexon Moneva maoy nangu sa balanseng ataki sa David Justin uban ang 30 puntos. Si Erwin Brigole midugang og 18 puntos, samtang sila si Russel Moneva ug Joseph Cabahug midonar og 12 puntos matag usa.

Sa laing aksiyon, ang Team Amicis  midaog sab batok sa Geobert, 69-65  luyo sa pagtambayayong nilang Rovello Robles ug Lee Mar Dahil nga nakatigum og 44 puntos.