Eagles kampiyon sa Elite Basketball Season 15

CEBU, Philippines – Mipatigbabaw ang Eagles  batok sa Cheetahs sa sikit kaayo nilang kumbati sa finals, 81-78  aron langkaton ang kampiyonato sa Elite Basketball Club Cebu  Season 15 didto sa Visayan Glass gym sa Barangay Guadalupe ning Dakbayan sa Sugbo.

Kulbahinam kaayo ang sangka sa duha ka karibal sa tibuok  sa duwa   gumikan kay walay nakalabaw kanila og sobra sa singko puntos.

Alkansi og tres puntos human sa tulo ka kuwarter, 51-54, ang Eagles mipakita og solidong opensa sa naghinapos nga bahin sa duwa aron payak-on ang Cheetahs.

Si Randy de la Pisa maoy nangu sa Eagles uban ang 21 puntos hinungdan nga siya maoy gibayaw nga MVP.

Miabag ni De la Pisa si Janjan Auditor nga mihipos og 17 puntos ug ingon man si playing team owner Mark Anthony Ynoc nga miamot og nuybe puntos alang sa Eagles.

Si Vernon Anfone mitapos uban ang 19 puntos, si RJ Acha mi-iskor og 16 puntos, samtang si John Rodrigo mitali og 10 puntos, apan nakawang ang ilang paningkamot kay napukan ang Cheetahs.