Petracorta kampiyon sa CABL Season 2

CEBU, Philippines — Natuman ang pangandoy sa Petracorta Customs Brokerage nga makampiyon human midaog batok sa Canillas Customs Brokerage sa kulbahinam kaayo nilang duwa sa finals sa Cebu Aduana Basketball Legends (CABL) Season 2 niadtong Sabado didto sa CPA Recreation Center sa Pier 6, North Reclamation Area, Dakbayan sa Sugbo.

Dili hinuon sayon ang kadaogan sa Petracorta kay miagi pa kini og overtime una nila mapilde ang Canillas, 89-87.

Si Toni Largosa maoy naka-anghel sa Petracorta human   mapasud ang dul-it niyang itsa dayong kapupos sa oras. Pero si Francis Palero hinuon ang nangu sa kadaogan nga mikadlit og 21 puntos, samtang si Largosa mikulit og 14 puntos.

Mikawat sab og salida sila si Reyden Villaronza ug Nato Agustinez nga  nagkumboya'g 22 puntos sa Petracorta ni team owner Mayor Melchor Petracorta nga miamot og nuybe puntos pinaagi sa tulo ka tres.

Ang napildeng Canillas gipangulohan ni Rex Bensi nga mibagnos og 24 puntos, gisundan ni Junard Ciabo nga miambit og 16 puntos.

Dili kaayo maayo ang produksiyon nilang Noel Medalle ug Ferdi Sigue diin igo lang sila miiskor og 12 puntos.

Nakalabaw unta ang Canillas, 72-71 kortesiya sa 3-point shot ni Medalle, apan si Largosa miposa og usa ka duha ka free throws aron makaigwalis ang Petracorta, 72-all sa katapusang 1:17 sa regulasyon. Nag-igwalis pag-usab ang iskor, 76-all human nakompleto ang duha ka free throws ni Geryl Bukiron sa nahibiling 40 segundos ug duna unta'y purohan ang Canillas nga  modaog dihang ila ang ball possession sa nahibiling 16 segundos, apan mikagar ang tira ni Sigue hinungdan sa overtime.

Sa dugang singko minutos, padayon nagsinukliay ang mga karibal.

Anaa na unta sa baba  sa kadaogan ang Canillas dihang labaw sila og singko puntos sa katapusang 58 segundos, 85-80, apan gitirahan sila og tres ni Petracorta aron mosikit, 85-83.

Nahimong kulbahinam ang duwa dihang nakaigwalis ang Petracorta, 85-all sa itsa ni Palero. Nilabaw og balik ang Canillas, 87-85 sa free throws ni Ciabo, apan si Palero mibuhi og krusyal nga itsa aron magtabla sa katapusang higayon, 87-all sa nahibiling 16 segundos.

Gihatagan ang Canillas og laing higayon aron modaog, apan wala masud ang itsa ni Medalle ug nakuha ni Palero ang rebound ug dayong pasa ngadto ni Largosa nga maoy misilyo sa daog sa Petracorta.

Sa laing bahin, ang Jam Customs Brokerage milubong sa Portmen, 96-80 aron dag-on ang ikatulong dapit.

Lima ka players sa Jam ang miiskor og double figures pinangulohan ni Jovani nga adunay 30 puntos.

Si Jaymar Elloren miamot og 17 puntos, ang team manager nga si Primitivo Mondin mitampo'g 14 puntos, samtang sila si Unale Monares ug Mark Rodriguez nagkumbinar og 25 puntos.

Nangu sa Portmen mao si Reggie Regidor sa iyang 24 puntos, gisundan ni James Jordan sa iyang 12 puntos ug team manager Boodee Monteño nga adunay 11 puntos.

PUNTOS MATAG USA

Unang duwa:

JAM (96) – Jovani 30, Elloren 17, Mondin 14, Monares 13, Rodriguez 12, Avenido 7, Jovita 3, Caraballe 2.

PORTMEN (80) – Regidor 24, Jordan 12, Monteño 11, Villacampa 9, Oyao 8, Cal 7, Caburnay 4, Embrado 3, Viador 2.

Ikaduhang duwa:

PETRACORTA (89) – Palero 21, Largosa 14, Villaronza 12, Agustinez 10, Melchor 9, Nadal 7, Villacastin 5, Mabangue 4, Sagarino 4, Reyes 2.

CANILLAS (87) – Bensi 24, Ciabo 16, N. Medalle 12, Sigue 12, Gambe 6, Marata 6, Sillar 5, Cabanada 4, Bukiron 2, Banzon 1.