PLDT hiniya ang F2 Logistics
MANILA, Philippines — Ginulantang ng PLDT Home Fibr ang F2 Logistics sa bendisyon ng makapigil-hiningang 25-21, 26-28, 15-25, 25-19, 15-11 desisyon upang masungkit ang ikaanim na panalo sa 2019 Philippine Superliga All-Filipino Conference kahapon sa Corpus Christi Gym sa Cagayan de Oro City.
Sumandal ang Power Hitters sa matikas na laro nina three-time NCAA MVP Grethcel Soltones na siyang kumana ng game-winning hit at Jerrili Malabanan na umiskor ng tatlo sa huling limang puntos ng kanilang tropa.
Magarbong tinapos ng PLDT ang eliminasyon tangan ang 6-8 baraha na madadala nito sa pagpasok ng knockout quarterfinals sa susunod na linggo.
Tabla ang laro sa 1-1 kung saan bahagyang angat ang Cargo Movers sa third set, 8-7 nang itigil ang laro dahil sa matinding init sa venue.
Nagpasya ang organiser na ihinto muna ang laro upang bigyan ng pagkakataon ang mga manlalaro gayundin ang mga coaches at officials na makarekober sa tindi ng init ng venue.
Mismong si Power Hitters head coach Roger Gorayeb ang bahagyang naapektuhan ng maalinsangang panahon dahil sa hindi gumaganang airconditioning.
Pinalabas ng playing court ang mga players at coaches.
Nagpatuloy ang laro matapos ang mahigit isang oras.
Ito ang ikalawang dikit na kabiguan ng F2 Logistics para mahulog sa 11-2 rekord.
- Latest