Jam, Petracorta mikompleto sa final 4 sa CABL Season 2
CEBU, Philippines — Gitagak sa Jam Customs Brokerage ug sa Petracorta Customs Brokerage ang tagsa-tagsa nilang mga kontra aron moabante sa semifinals sa Cebu Aduana Basketball Legends (CABL) Season 2 niadtong Sabado didto sa Basak gym, Dakbayan sa Sugbo.
Ang Jam mipilde sa Opascor sa iskor nga 72-63, samtang gipilde sab sa Petracorta ang JD&M Customs Brokerage sa ligas kaayo nilang duwa, 81-78.
Mikumbati og maayo si Jaymar Elloren ug gipangulohan ang Jam pinaagi sa iyang 29 puntos, gisundan ni Jovanni nga mikadlit og 20 puntos aron ilang madispatsar ang Opascor ni playing team manager Digoy Solidarios.
Sa pikas bahin, si Francis Palero mibagnos og 32 puntos aron mangu sa scoring sa Petracorta nga nakalingkawas sa kulbahinam nga duwa.
Sila si Reyden Villaronza ug Edu Nadal nagkumboya'g 23 puntos sa maong kadaogan.
Tulo sab ka players sa JD&M ang miiskor og double figures nga gipangulohan ni Alan Sepe nga mipatuasik og 20 puntos. Si Pabling Gerenalao miambit og 18 puntos, samtang si Francis Ibo mitimang og 13 puntos sa napildeng JD&M Customs Brokerage ni Jonathan Matibag.
Ang semifinals duwaon karong Sabado diin sangkaon sa Jam ni Primitivo Mondin ang no. 1 nga Canillas Customs Brokerage ni Roy Canillas, samtang ang Petracorta ni Mayor Melchor Petracorta moharong sa no. 2 nga Portmen ni Boodee Monteño.
Ang Canillas ug Portmen pulos mga armado og 'twice-to-beat' sa semifinals.
Ang liga gipadagan nilang Janno Boniao, Noel Medalle, Ferdinand Sigue, Sidney Ganapin ug Jun Gayo, ingon man ni Roy Canillas isip consultant.
Puntos Matag Usa
Unang duwa:
JAM (72) – Elloren 29, Jovanni 20, Mondin 5, Diano 4, Avenido 4, Entero 4, Jovita 2, Rodriguez 2, B. Medalle 2.
OPASCOR (63) – Quiño 9, Empleo 9, Gaviola 9, Libran 8, Rafanan 6, Solidarios 6, Oswa 6, Valenzuela 4, Empleo 2.
Ikaduhang duwa:
PETRACORTA (81) – Palero 32, Villaronza 13, Nadal 10, M. Petracorta 9, Sagarino 4, Agustinez 3, Petracorta 2, Rys 2.
JD&M (78) – Sepe 20, Gerenalao 18, Ibo 13, Jamolin 9, Palad 8, Valle 4, Badon 4, Inhambre 2.
- Latest