Kawhi, pg pirma na'g kontrata

CEBU, Philippines – Sila si  Kawhi Leonard ug Paul George opisyal na nga mga sakop sa Los Angeles Clippers human gipahibalo kagahapon sa team nga si Kawhi nakapirma na og kontrata uban kanila ug hingpit na nilang napinalisar ang trade nga naghatod ni George sa ilang poder gikan sa Oklahoma City Thunder.

Wala gidetalye sa Clippers ang nalatid sa ilang kasabotan ni Leonard, apan gitaho sa ESPN ug The Athletic website nga si Kawhi mipirma og tulo ka tuig nga kontrata ug dili upat segun sa nahiunang mga balita.

Ang tulo ka tuig nga kontrata ni Leonard mibalor og $103.1 million, imbes nga $142 million sud sa upat ka tuig. Samtang si George garantisado nga modawat og $136.9 million sud sa upat ka tuig.

Ang duha ka NBA superstars mahimong dili motiwas sa tagsa-tagsa nila ka mga kontrata sugod sa 2021-2022 season.

Kon ugaling tinuod, ang Clippers mahimong makatanyag ni Leonard og upat ka tuig nga kontrata nga mobalor og $196 million sa 2021 ug ingon man lima ka tuig nga kontrata alang ni George nga mokantidad og $254 million sa susamang higayon.

Si Leonard nga lumad gikan sa Los Angeles, mibiya sa Toronto Raptors human niya hatagi ang koponan  sa labing unang kampiyonato sa NBA sud sa 24 ka tuig nga kasaysayan sa ilang prangkisa.

Nakuha sa Raptors si Leonard gikan sa San Antonio pinaagi sa usa ka trade nga naghatod ni DeMar DeRozan ngadto sa Spurs. 

Uban sa Raptors, si Leonard mi-average og 30.5 points, 9.1 rebounds ug 3.9 assists sa playoffs, ug 26.6 points, 6.3 rebounds, ug 2.4 assists sa regular season.

Si Leonard gikataho nga dili mosugot nga mapunta sa Clippers kon ugaling dili ikauban kaniya si George, butang nga gipangitaan gyud og paagi sa Clippers hinungdan nganong nalandig sa ilang tugkaran ang two-time Finals MVP uban si PG.