Island Hot Wings naghari sa FYA season 23

CEBU, Philippines – Nagmaya ug naghudyaka ang taga-Island Hot Wings kay ila gyud nga nakab-ot  ang gipangandoy nga kampiyonato sa FYA Basketball Tournament Season 23 Yoyi's Pastries & Desserts Cup 2019.

Dili hinuon sayon ang misyon sa Island Hot Wings tungod kay miagi pa kini og overtime una nila mataak ang tungason nga kadaogan batok sa Harold's Hotel, 98-87 sa finals niadtong Martes sa miaging semana didto sa Atillo gym sa Labangon Dakbayan sa Sugbo.

Ang finals MVP nga si Justine 'FYA Hotshot' Urot maoy topscorer sa Island Hot Wings nga mibagnos og 28 puntos.

Si Urot mao sab ang nangu sa Mythical Five uban ni season MVP Mclain Alkuino sa Harold's Hotel, Daniel Enriquez sa Island Hot Wings, Jao Rabadon sa Yoyi's Pastries & Desserts ug Dexter Caballero sa AVTES.

Gipasidunggan sab si Rommel 'Mr. Sticky' Laput nga maoy midaog sa Sportsmanship award.

Nakatabang sab og dako sa kadaogan sa Island Hot Wings  silang Daniel Enriquez ug Van Anthony Ensong nga mitampo'g 18 ug 14 puntos.

Sayo unta nga makuha sa Island Hot Wings ang daog, apan nabaraw kini dihang nakatabla ang Harold's Hotel, 84-all nga nakapuwersa sa duwa ngadto sa overtime.

Sa dugang singko minutos, ang Island Hot Wings ni Junrey Arreglo mipatuasik og mga puntos ug wala na kini motugot nga makasikit pa ang Harold's Hotel.

Ang Harold's Hotel ni Arnel Trinidad gipangulohan ni Jade Ursal nga mikamada og 25 puntos, gisundan ni Mclain 'The Captain' Alkuino nga adunay 16 puntos ug Nene Billones sa iyang 13 puntos.

Sa pasiunang duwa, miagi sab og overtime ang AVTES sa wala pa nila matungas ang kutas ug ligas nga daog batok sa Yoyi's Pastries & Desserts, 102-98 aron mopahiluna sa ikatulong dapit.

Kulba kaayong nakaduwa si Dexter 'The Blur' Caballero diin mibagdok kini og 35 puntos aron mangu sa scoring sa AVTES nilang Allen Tulod ug Macky Macachor.

Si Roland Canoy mitampo og 21 puntos, samtang si Jas Sydiongco miamot og 15 puntos.

Gipangulohan sab ni Jao 'The Furious' Rabadon ang Yoyi's Pastries & Desserts pinaagi sa iyang 32 puntos, gisundan ni Juls Aglipa nga adunay 17 puntos, samtang sila si Socrates Aglipa ug Carl Cababahay nagtampohay og 15 puntos sa napildeng team ni Ahlmark Albarracin.

PUNTOS MATAG USA

Unang duwa:

AVTES (102) – Caballero 35, Canoy 21, Sydiongco 15, W. Dacayana 8. Macachor 6, Tulod 6, Laput 5, A.J. Abella 2.

YOYI's Pastries (98) – Rabadon 32, J. Aglipa 17, S. Aglipa 15, Cababahay 15, Salvador 8, Ursal 5, Hanginon 4, Mata 4, Martinez 2.

Ikaduhang duwa:

ISLAND Hot Wings (98) – Urot 28, D. Enriquez 18, Ensong 14, Arreglo 8, Flores 8, Patalita 6, E. Noquillo 4, G. Noquillo 4, Laud 4, Arias 2, Garcia 2.

HAROLD's Hotel (87) – Ursal 25, Alkuino 16, Billones 13, R. Dacayana 9, Flores 8, J. Cabañez 3, Jumantoc 3, Celestial 3, Villacastin 3, Parba 2, Arnado 2.