Kawhi makig-estorya sa Lakers

CEBU, Philippines — Si Kawhi Leonard nga bag-ohay pang migiya sa Toronto Raptors ngadto sa labing una nilang titulo sa NBA, gikatakda nga makig-estorya sa Los Angeles Lakers pagtimaan nga gikonsidera na niini ang posibleng mga tanyag kaniya sa giatngan nga free agency.

Apan segun sa balita sa ESPN kagahapong adlawa, si Leonard gusto nga makigtagbo sa duha lamang ka mga tawo -- ang tag-iya sa Lakers nga si Jeanie Buss ug ang kanhi presidente sa basketball operations nga si Magic Johnson.

Si Johnson miluwat sa iyang puwesto niadtong Abril ug giakusahan niini si Lakers general manager Rob Pelinka nga mibukobuko kaniya.

Ang 27-anyos nga si Leonard tataw nga gustong masayod nganong nagkabuwag ang Lakers ug si Johnson.

Apil kini sa mga butang nga hatagan niya og konsiderasyon sa dili pa modesider kon moduwa ba siya sa iyang hometown team.

Kon ugaling makalingkawas ang Lakers sa kasamok sa ilang front office ug makapresentar og makabungog nga tanyag ngadto sa two-time NBA Finals MVP, si Leonard lagmit moporma og usa ka kahadlokang puwersa uban nilang LeBron James ug Anthony Davis sa Lakers

Wala na pahimusli pa ni Leonard ang opsiyon sa katapusang tuig sa iyang kontrata sa Raptors hinungdan nga usa na siya karon ka unrestricted free agent.

Dako sab hinuon ang posibilidad nga si Leonard mobalik sa Raptors nga makahatag kaniya og lima ka tuig nga kontrata nga mobalor og $160 million, mas labaw og $50 million sa ikatanyag sa ubang teams nga interesadong mokuha kaniya.

Gawas sa Lakers ug Raptors, ang LA Clippers gusto sab nga mabira si Leonard ngadto sa ilang kampo.

Kay nanga-injured man ang duha ka superstars sa Golden State Warriors nga sila si Kevin Durant ug Klay Thompson nga pareho sab mga free agents, walay lalis nga si Leonard maoy labing bililhon nga player nga ilogan unya sa NBA free agency nga magsugod ugmang adlawa.