Petrogazz, Creamline magkakasubukan uli
MANILA, Philippines — Muling maghaharap ang reigning champion Creamline Cool Smashers at nangungunang PetroGazz Angels sa inaabangang rematch sa 2019 Premier Volleyball League (PVL) Reinforced Conference ngayong hapon sa The Arena sa San Juan City.
Magpapang-abot ang Cool Smashers at Gazz Angels sa alas-4 ng hapon.
Hangad ng Cool Smashers na makabawi sa 22-25, 24-26, 22-25 kabiguang tinamo nito sa Gazz Angels sa kanilang unang pagtatagpo sa first round.
Kaya naman inaasahang dadanak ang matinding aksiyon sa oras na magkrus ang landas ng Creamline at PetroGazz
Matapos magtamo ng unang kabiguan, anim na sunod na panalo ang naikonekta ng Cool Smashers para kapitan ang No. 2 spot na nagbigay sa kanila ng awtomatikong tiket sa semis.
Galing ang Creamline sa matikas na pagpapabagsak sa Motolite noong Miyerkules kung saan umariba ng husto sina imports Kuttika Kaewpin at Aleoscar Blanco gayundin si three-time UAAP MVP Alyssa Valdez.
Kumana sina Kaewpin at Blanco ng tig-13 puntos sa naturang laro habang may 10 hits at 12 digs si Valdez para suportahan ang kanilang imports.
“We’re just really happy that we are really jelling and our chemistry as a team is back,” ani Valdez.
Ngunit daraan sa matinding pagsubok ang Cool Smashers dahil namamayagpag ang Gazz Angels hawak ang imakuladang 7-0 baraha.
- Latest