SWU Cobras makigbahin sa liderato
CEBU, Philippines – Nanghinaut ang Southwestern University (SWU)-Phinma Cobras nga makaangkon og bahin sa liderato sa seniors division sa dihang ilang harungon ang Cebu Institute of Technology-University (CIT-U) Wildcats sa 2019 Cebu Schools Athletic Foundation, Inc. (CESAFI) Partner's Cup karong adlawa diha sa University of San Carlos (USC)-Main gym.
Nadasig human bihaga ang University of San Jose-Recoletos (USJ-R) Jaguars, tumong sa Cobras nga makasagunson og daog sa ilang pakigtige sa Wildcats sa third game nga gikatakda sa alas-3:30 sa hapon.
Kon molampos, ang Cobras makig-uban sa Joemang's Surplus-University of Cebu (UC) Webmasters sa hataas nga bahin sa liderato.
Samtang ang Cebu Landmasters-USC Warriors ug USJ-R Jaguars mosuway og kulit og daog, apan usa kanila ang seguradong mahagba na sab human sa ilang engkuwentro sa alas-5 sa hapon.
Sa juniors level, ang Hotel Fortuna-UC Junior Webmasters ug Tough Gear/SWU-Phinma Baby Cobras parehong naglaraw nga moposte og 2-0 nga sugod sa dihang ilang sangkaon ang Cebu Elite-USC Baby Warriors ug CIT-U Wildkittens sa pasiunang duwa sa alas 12:30 sa hapon.
- Latest
