GS Warriors emosyonal makigharong sa Raptors

CEBU, Philippines — Moduwa nga wala si Kevin Durant sa ilang pagpanamilit sa binyu diin sila mitukod og dinastiya, ang Golden State Warriors momartsa ngadto sa usa ka emosyonal nga engkuwentro sa NBA Finals batok sa Toronto Raptors karong adlawa.

Sa katapusang duwa sa Golden State didto sa Oracle Arena sa Oakland, California, ang Warriors naglaraw nga makatabla samtang ang Raptors mosuway na sab pagkulit og kasaysayan sa Game-6 sa ilang 'best-of-seven' series karong alas-9 sa buntag.

Ang pagka-injured ni Durant ug ang katapusan nilang salida didto sa ilang korte atubangan sa bagang duot sa ilang fans tataw nga maoy himuong inspirasyon sa Warriors sa tinguha nga iduso ang serye ngadto sa tibuok niining rota.

"To protect our home court, feed off our crowd's energy, play for K and try to keep our season alive, there are a lot of things that you can tap into for energy," matud pa ni Warriors guard Stephen Curry. "We'll be ready."

Ang  Splash  Brother ni Curry nga si Klay Thompson ug ingon man si DeMarcus Cousins nangagpas sab og makasaysayanong suporta gikan sa ilang mga dumadapig ilabi na kay gikinahanglan kini nila og maayo karon.

"I expect our fans to be the loudest they've ever been, especially in the name of Kevin and bringing his type of spirit to the fight and the competitiveness," sumala pa ni Thompson.

"It's going to be an epic night for sure," batbat pa ni Cousins. "Going to be a lot of emotions and a lot of passion in the building.

Kon  modaog, ang Warriors nga naglaraw sa ikatulo nilang sagunson nga titulo ug ikaupat sa miaging lima ka season, mopuwersa og tinagakay nga Game-7 karong Lunes didto sa  korte sa Raptors.

Ang kasaysayan pabor hinuon gihapon sa Raptors gumikan kay sa 34 ka teams nga nakatikang sa NBA Finals, usa pa lamang ang nakampiyon human malubong og 3-1 sa usa ka serye. Nahimo kini ni LeBron James ug Cleveland Cavaliers nga sulagma kaayong batok sa Warriors niadtong 2016.

Aron makab-ot sa Raptors ang ilang misyon nga mosuway og kasaysayan, kinahanglan nga mangita sila og paagi unsaon pagpugong nilang Curry ug Thompson.

"We've got to figure out a way to control those two,"  matud ni Raptors coach Nick Nurse. 

Gawas niini, ang Raptors nanginahanglan sab og maanindot nga salida ug balanseng opensiba gikan nilang Kawhi Leonard, Kyle Lowry, Pascal Siakam, Marc Gasol, Danny Green, Fred VanVleet, Danny Green, Serge Ibaka ug Norman Powell aron ilang mapalukapa sa hingpit ang Warriors.