Raptors mohimo'g kasaysayan

CEBU, Philippines — Naghinam-hinam na ang Toronto Raptors nga mokulit og laing kasaysayan, apan angayan silang mangandam sa usa ka dakong gubat kay ang Golden State Warriors seguradong makigpatay aron makaangkon og laing kinabuhi sa ilang panag-abot sa Game-5 sa NBA Finals karong alas-9 sa buntag didto sa Scotiabank Arena sa Toronto, Canada.

Bitbit ang 3-1 nga bentaha, ang Raptors mosuway og angkon sa labing una nilang titulo sa 24 ka tuig nga kasaysayan sa ilang prangkisa. Buot sab nilang mamahimong labing unang team gawas sa Amerika nga nakampiyon sa NBA.

Nakapabor man tuod, apan lisud gihapon nga tahas ang sagubangon sa Raptors ilabi kay posibleng mobalik na og duwa ang superstar sa Warriors nga si Kevin Durant.

Si Durant miapil og praktis kagahapon uban sa Warriors, timaan nga posible siyang ibala ni coach Steve Kerr batok sa Raptors ning krusyal nga duwa diin wala na'y ugma nga nagpaabot kanila kon ugaling mapilde sila.

Samtang sa pagsuwat ning balita, wala pa  mipakanaog og desisyon si Kerr kabahin ni Durant, apan lagmit iya kining ipahibalo sa dili pa ang duwa karon.

Kon makaduwa na gyud si Durant, tataw nga dako kini og ikatabang sa Warriors ug ingon man makapadasig og samot sa uban pa nilang mga bitoon nga sila si Stephen Curry, Klay Thompson, Draymond Green ug DeMarcus Cousins.

Andam hinuon ang Raptors kon ugaling motaak si Durant sud sa korte batok kanila.

Apan giklaro ni Kyle Lowry nga dili si Durant maoy ilang pokus kon dili ang kaugalingon nilang team nga molampos sila sa ilang misyon.

Sa kasaysayan sa NBA Finals, usa pa lamang ka team ang nakampiyon human malubong og 3-1 sa usa ka best-of-seven series.

Ang nakakab-ot sa maong dungog mao si LeBron James ug Cleveland Cavaliers niadtong 2016 batok sa Warriors.

Karon nga ang Warriors na sab maoy nabutang sa maong sitwasyon, dako nilang hagit mao ang pagkulit og kaugalingon nilang kasaysayan. (BANAT NEWS)