Spiderman ikaha sa pba kay nakamugna'g kagubot

CEBU, Philippines — Desidido si PBA Commissioner Willie Marcial nga pasakaan og kaso ang usa ka fan nga si Paolo Felizarta  tungod sa pagmugna og kagubot atol sa Game-5 sa PBA Philippine Cup finals.

Sa maong duwa, si Felizarta kalit nga midagan sa tunga sa korte sul-ob ang usa ka Spiderman costume diin nabangaan niya ang sentro sa San Miguel Beermen nga si JuneMar Fajardo nga natumba kay  maayong pagkaigo ang suwang niini sa ulo sa maong fan.

Si Felizarta daling gilayog ug gigawas sa mga security sa Smart Araneta Coliseum, samtang wala kapugngi ni Beermen veteran Ronald Tubid ang pagsukmag sa ulo sa maong fan.

Si Marcial nagkanayon nga delikado ang gibuhat ni Felizarta ug dili usab kini angay nga sundon sa uban nga fan.

"We don't tolerate such acts," matud pa ni Marcial atol sa usa ka press conference human sa duwa. Si Marcial miingon nga duha ka kaso ilang ipasaka batok ni Felizarta ug kini mao ang 'alarm and scandal' ug 'unjust vexation'.

Si Felizarta mirason nga laraw lang niya nga mopadayag og mensahe sa mga Pinoy nga mao ang pagkahiusa gamit usab iyang gidala nga placards, apan si Marcial wala midawat niini tungod kay sayop ang paagi sa maong fan.