Davis wa makatiwas og duwa

CEBU, Philippines – Nahimong bayani si Julius Randle sa kadaogan sa New Orleans Hornets pinaagi sa pagtusak og tulo ka sagunson nga itsa sa himalatyong segundos sa duwa.

Si Randle mikadlit og 33 puntos ug milangkat og 11 ka rebounds alang sa  Hornets nga mipilde sa Oklahoma City Thunder sa iskor nga 131-122.

Gipilde sa Pelicans ang Thunder bisan og wala makatiwas og duwa ang ilang superstar nga si Anthony Davis gumikan sa injury sa  abaga niini human sa first half. Sa iyang pagbiya, si Davis mirehistro og 14 puntos, upat ka rebounds ug duha ka assists nga nakatabang sa iyang koponan pagposte og 66-63 nga labaw sa halftime.

Gumikan niini, wala pa'y klaro kun makapakita ba og aksiyon si Davis sa giatngan nga All-Star Game karong weekend didto sa Charlotte, North Carolina.

Wala sab magpabitin si Jrue Holiday nga mitali og 32 puntos ug pito ka assists alang sa Pelicans.

Si Russell Westbrook miinat sa sunod-sunod niyang "triple-double" ngadto sa 11 ka duwa uban ang 44 puntos, 14 ka rebounds ug 11 ka assists, apan wala mapahimusli sa Thunder.

Nakawang sab ang 28 puntos ni Paul George alang sa Oklahoma City, kansang upat ka sagunson nga daog naputol.

Ang Pelicans maoy nagdiktar sa dagan sa duwa gikan sa pagsugod diin usa ka higayon  naglabaw og 17 puntos. Igo lamang nakasikit ang Thunder ngadto sa tres puntos, 118-121 sa nahibilin nga 2:52 sa duwa.